पुणे: पुण्यातील गणेशोत्सवात डीजे आणि ध्वनिप्रदूषणाच्या मुद्द्यावर भूमिका मांडणारे सामाजिक कार्यकर्ते विद्यानंद बापट सध्या चर्चेत आहेत. देवी-देवता, गणेशोत्सव आणि हिंदू धार्मिक श्रद्धांबाबत त्यांनी केलेली काही वक्तव्ये आक्षेपार्ह असल्याचा दावा करत मुंबई उच्च न्यायालयातील वकील प्रदीप नाईक यांनी त्यांना कायदेशीर नोटीस पाठवली आहे.
या नोटीसमध्ये बापट यांनी नोटीस मिळाल्यानंतर 48 तासांच्या आत लेखी स्पष्टीकरण द्यावे आणि हिंदू भाविकांची बिनशर्त माफी मागावी, अशी मागणी करण्यात आली आहे. दिलेल्या मुदतीत समाधानकारक उत्तर न मिळाल्यास फौजदारी तसेच इतर कायदेशीर मार्गाने कारवाई करण्याचा इशाराही देण्यात आला आहे.
ध्वनीप्रदूषण, लाऊडस्पीकर, मिरवणुका किंवा सार्वजनिक उत्सवांबाबत आपले मत मांडण्याचा प्रत्येकाला अधिकार आहे, असे नोटीसमध्ये नमूद करण्यात आले आहे. मात्र, अभिव्यक्तिस्वातंत्र्याचा वापर करताना इतरांच्या धार्मिक भावना दुखावल्या जाऊ नयेत, अशी भूमिका ॲड. नाईक यांनी मांडली आहे. विद्यानंद बापट हे मूळचे रत्नागिरीचे असून गेल्या 8 वर्षांपासून पुण्यातील नारायण पेठ परिसरात राहत आहेत.
दरम्यान, डीजे आणि ध्वनीप्रदूषणाच्या भूमिकेमुळे बापट यांना यापूर्वी विरोधाला सामोरे जावे लागले होते. पुणे महापालिकेच्या सभेतही त्यांनी डीजेविरोधात भूमिका मांडली होती. त्यानंतर आता त्यांना मारहाण झाल्याची घटनाही समोर आली आहे.
