करमाळा : करमाळा तालुक्यातील वरकुटे गावाजवळील घोटी परिसरात मनोहर भोसले ऊर्फ मनोहर मामा याचा मोठा प्रभाव होता. त्याच्या मठात विविध कारणांसाठी भाविकांची गर्दी होत असल्याचे सांगितले जाते. मात्र, सध्या मनोहर भोसले सोलापूरच्या कारागृहात असून त्याच्याविरोधातील तपासामुळे प्रकरणाला वेगळी दिशा मिळाली आहे.
दरम्यान, या प्रकरणात कुर्डूवाडीतील अंधश्रद्धा आणि जादूटोणाशी संबंधित प्रकरणात दत्तकला शिक्षण संस्थेचे अध्यक्ष प्रा. रामदास झोळ यांच्यासह तिघांना सहआरोपी करण्यात आले. यापैकी दोघांना अटक झाली असून रामदास झोळ अद्याप फरार आहेत.
मनोहर भोसले मागील दीड महिन्यापासून कारागृहात आहे. स्वत:ला बाळू मामाचा अवतार असल्याचे सांगून त्याने भाविकांची दिशाभूल केल्याचे आरोप आहेत. त्याच्यावर आर्थिक फसवणूक आणि जमिनीशी संबंधित गैरव्यवहार केल्याचा गंभीर आरोप असून, त्याच्याविरोधात आतापर्यंत 6 गुन्हे दाखल असल्याची माहिती आहे. त्यामुळे त्याचा कारागृहातील मुक्काम आणखी वाढण्याची शक्यता व्यक्त केली जात आहे. दरम्यान, भक्तांच्या गर्दीत असलेल्या मनोहर भोसलेला कारागृहात मात्र कोणीच भेटायला आलं नसल्याचं समोर आलं आहे.
या प्रकरणाच्या तपासासाठी विशेष तपास पथक म्हणजेच एसआयटीची स्थापना करण्यात आली होती. तपासादरम्यान मनोहर भोसलेसोबत 24 जणांची टीम कार्यरत असल्याचे समोर आले. आता या व्यक्तींविरोधातही कारवाई सुरू करण्यात आल्याचे सांगण्यात येत आहे. याशिवाय मनोहर भोसलेचे काही शिक्षण संस्थांशी संबंध असल्याचा संशय तपास यंत्रणांना आहे. या दिशेनेही पोलिसांकडून चौकशी केली जात आहे. त्यामुळे तपासाचा आवाका वाढण्याची शक्यता आहे.
कारागृहातील मनोहर भोसलेच्या वर्तनावरही पोलिसांचे लक्ष आहे. बाहेर असताना धार्मिक कार्यक्रम आणि दरबारासाठी मोठी गर्दी होत होती. मात्र, सध्या तो कारागृहात असून तेथील नियमांनुसार राहावे लागत आहे. त्याच्यावर पोलिसांनी विशेष नजर ठेवली असल्याची माहिती आहे.
