मुंबई : ठाण्यात शिवसेना ठाकरे गटाचे विभागप्रमुख प्रदीप पूर्णेकर यांच्या हत्या प्रकरणाचा तपास पोलिसांनी अत्यंत जलद गतीने सुरू केला आहे. या प्रकरणाच्या चौकशीदरम्यान गुन्हे शाखेने तीन संशयितांना ताब्यात घेतले असून त्यांची कसून चौकशी केली जात आहे. आता या प्रकरणात शिंदे गटाच्या नेत्या आणि ठाण्याच्या माजी महापौर मीनाक्षी शिंदे यांना चौकशीसाठी बोलावलं जाण्याची शक्यता वर्तवली जात आहे.
ठाकरे गटाकडून शिंदे गटाच्या नेत्या आणि ठाण्याच्या माजी महापौर मीनाक्षी शिंदे यांच्यासह त्यांचे पती राजेंद्र शिंदे यांच्यावर थेट संशय व्यक्त केला जात आहे. मीनाक्षी शिंदे यांनी काल पत्रकार परिषद घेऊन हे सर्व आरोप पूर्णपणे फेटाळले आहेत. केवळ आपण एकनाथ शिंदे यांच्या पक्षाशी जोडलेले असल्यामुळे राजकीय द्वेषापोटी आपले नाव यात ओढले जात असल्याचा दावा त्यांनी केला आहे. मात्र सूत्रांच्या माहितीनुसार या प्रकरणात मीनाक्षी शिंदे आणि त्यांच्या पतीला लवकरच चौकशीसाठी बोलावले जाऊ शकते, ज्यामुळे त्यांच्या अडचणी वाढू शकतात.
खासदार संजय राऊत यांनी पोस्ट केलेला व्हिडिओ ‘एआय जनरेटेड’ असल्याचे सांगत, शिंदे यांनी आपण कोणत्याही पोलीस चौकशीला सामोरे जाण्यास तयार असल्याचे त्यांनी स्पष्ट केले आहे..घटनेचे गूढ उकलण्यासाठी गुन्हे शाखा आणि खंडणी विरोधी पथक संयुक्तपणे तपास करत आहेत. या गुन्ह्यात अटक करण्यात आलेले संशयित आरोपी निखिल यादव आणि नितेश पवार यांना ठाणे न्यायालयाने 8 तारखेपर्यंत पोलीस कोठडी सुनावली आहे.
प्राथमिक चौकशीनंतर या आरोपींना पुढील तपासासाठी दुसऱ्या विशेष पथकाकडे सोपवण्यात आले आहे. पोलीस आता या हत्येमागचा मुख्य सूत्रधार कोण आहे, गुन्ह्यात कोणती शस्त्रास्त्रे वापरली गेली आणि हत्येची पूर्वयोजना कशी आखली गेली याचा शोध घेत आहेत.
तपासाचा भाग म्हणून पोलीस घटनास्थळाच्या आजूबाजूचे सीसीटीव्ही फुटेज तपासत आहेत. तसेच प्रत्यक्षदर्शी दुकानदार, परिसरातील नागरिक आणि आरोपींच्या नातेवाईकांनाही चौकशीसाठी पाचारण केले जाणार आहे. या तपासातून लवकरच धक्कादायक माहिती समोर येण्याची शक्यता असल्याने संपूर्ण राज्याचे लक्ष या प्रकरणाकडे लागले आहे.
