सागर घरत
करमाळा : शेलगाव (वांगी) ते ढोकरी या १४ किलो मीटर लांबीच्या रस्त्याचे दुरुस्तीकरण कामाला प्रधानमंत्री ग्रामसडक योजनेअंतर्गत मंजुरी मिळाली असून हे काम सुरू झाल्याची माहिती मकाईचे माजी संचालक विवेक येवले यांनी दिली आहे.
यावेळी बोलताना येवले म्हणाले की, गेल्या अनेक वर्षांपासून या रस्त्याची दुरावस्था झाली होती. त्यामुळे या परिसरातील ८-१० गावांच्या दळणवळण व वाहतुकीचा प्रश्न बिकट झाला होता. याबाबत आमदार संजय शिंदे यांनी वरिष्ठ पातळीवरून पाठपुरावा करून हे काम मंजूर करून घेतले.
या संदर्भात २८ नोव्हेंबर २०२३ रोजी अधीक्षक अभियंता, प्रधानमंत्री ग्रामसडक योजना पुणे, कार्यकारी अभियंता सोलापूर यांना पत्राद्वारे पुढील कार्यवाही करण्याच्या सूचना दिल्या होत्या. त्यानुसार आता या रस्त्याच्या कामाला सुरुवात झाली आहे. यामुळे परिसरातील दळणवळण व वाहतुकीचा प्रश्न कायमस्वरूपी सुटलेला आहे.
रस्ते विकासासाठी अर्थसंकल्पात भरीव तरतूद
करमाळा तालुक्यातील रस्ते विकासासाठी जुलै २०२३ आणि डिसेंबर २०२३ च्या पुरवणी अर्थसंकल्पात भरीव तरतूद केलेली आहे. येणाऱ्या अधिवेशनात रस्ते विकासासाठी भरघोस निधी उपलब्ध होणार आहे. तालुक्याच्या पश्चिम भागामध्ये ऊस वाहतुकीमुळे रस्ते खराब होण्याचे प्रमाण वाढलेले आहे. त्यामुळे जेऊर ते चिखलठाण या रस्त्यासाठीही 13 कोटीचा निधी मंजूर असून लवकरच ते काम सुरू होणार आहे. तसेच पश्चिम भागातील वांगी २, वांगी १ यांना जोडणारे रस्ते यांच्यासाठी ही आपण येणाऱ्या अर्थसंकल्पात भरीव तरतूद करणार आहोत.
