पंढरपूर: शहराच्या मध्यवर्ती कुंभार गल्ली परिसरात सोमवारी रात्री साडे नऊच्या सुमारास आई आणि मुलाची घरात घुसून धारदार शस्त्राने हत्या करण्यात आली. या दुहेरी हत्येमुळे पंढरपूर हादरलं असून, परिसरात भीतीचे वातावरण निर्माण झालं आहे.
लखन जगताप आणि त्यांची आई सुरेखा जगताप अशी हत्या झालेल्यांची नावे आहेत. दोघेही घरात असताना घुसून अज्ञात हल्लेखोराने त्यांच्या अंगावर सपासप वार करत दोघांचाही जागीच खात्मा केला. लखनच्या पाठीवर व डोक्यावर तर सुरेखा यांच्या मानेवर आणि डोक्यावर गंभीर वार करण्यात आले.
हत्या कशासाठी? कोणाचा हात? तपास सुरू
या हत्येचं नेमकं कारण काय? हल्लेखोर कोण? एकच होता की एकाहून अधिक? हे सर्व प्रश्न अनुत्तरित असून, पोलिसांनी तपासाची चक्रे वेगाने फिरवली आहेत. हत्या झाल्याचे कळताच दोघांना तत्काळ रुग्णालयात नेण्यात आले, मात्र डॉक्टरांनी घटनास्थळीच मृत झाल्याचे घोषित केले.
पंढरपूर पोलिस स्टेशनचे अधिकारी व पथक घटनास्थळी दाखल झाले असून, सीसीटीव्ही फुटेज, शेजाऱ्यांचे जबाब, आणि इतर तांत्रिक पुरावे गोळा करण्याचे काम सुरू आहे.
या अमानुष घटनेमुळे कुंभार गल्लीत आणि पंढरपूर शहरात भीती व संतापाचे वातावरण आहे. पोलिसांनी या घटनेचा शोध लावून दोषींवर कडक कारवाई करावी , अशी मागणी नागरिकांकडून होत आहे.
