पुणे, ता. 27 : कायद्याचे रक्षण करण्याची जबाबदारी असलेल्या पुणे शहर पोलिस दलातील एका अंमलदारालाच अमली पदार्थांच्या कथित तस्करीप्रकरणी अटक करण्यात आल्याचा प्रकार समोर आला आहे. तेलंगणा राज्यात रेल्वेतून 12 किलो गांजा घेऊन जात असल्याच्या आरोपावरून तेथील पोलिसांनी संबंधित अंमलदाराला पकडले. या घटनेमुळे पुणे पोलिस दलात खळबळ उडाली आहे.
नितीन ज्ञानू शिंदे (वय 33, रा. पुणे) असे अटक करण्यात आलेल्या अंमलदाराचे नाव आहे. त्याच्याविरुद्ध तेलंगणा राज्यातील नेकुंडा पोलिस ठाण्यात अमली पदार्थविरोधी कायद्यानुसार गुन्हा दाखल करण्यात आला आहे.
नितीन शिंदे हा पुणे शहर पोलिस दलात कार्यरत असून, त्याची नेमणूक विश्रामबाग वाहतूक विभागात होती. तो 8 ऑक्टोबरपासून वैद्यकीय रजेवर होता. याच कालावधीत रेल्वेतून 12 किलो गांजा घेऊन जात असल्याच्या संशयावरून तेलंगणा पोलिसांनी त्याच्यावर कारवाई केली. या कारवाईची माहिती तेलंगणा पोलिसांनी पुणे पोलिसांना दिल्यानंतर हा प्रकार उघडकीस आला. पोलिस दलातील कर्मचाऱ्याचे नाव अमली पदार्थांच्या तस्करीप्रकरणी समोर आल्याने विभागात चर्चेला उधाण आले आहे.
दरम्यान, शिंदे हा गांजा नेमका कुठे घेऊन जात होता, त्याला हा अमली पदार्थ कोणी दिला आणि या कथित तस्करीमागे आणखी कोणाचा सहभाग आहे का, याबाबतची माहिती अद्याप स्पष्ट झालेली नाही. या प्रश्नांची उत्तरे तपासातून समोर येण्याची शक्यता आहे. अमली पदार्थांच्या तस्करीसारख्या गंभीर प्रकरणात पोलिस कर्मचाऱ्याचे नाव समोर आल्याने या प्रकरणाकडे लक्ष लागले आहे.
