पुणे: पुण्यात किरकोळ कारणांवरून मारहाण, कोयत्याचा धाक दाखवत लुटमार अशा घटना समोर येत असतानाच, आता आणखी एक धक्कादायक प्रकार उघडकीस आला आहे. वेश्यागमनासाठी बुधवार पेठेत गेलेल्या व्यक्तींचा पाठलाग करत, त्यांच्या घरापर्यंत पोहोचून “ऑनलाईन पैसे टाकतो, कॅश द्या” असं सांगत पैसे उकळल्याचा प्रकार समोर आला आहे. एवढ्यावरच न थांबता, “तुमचं नाव बदनाम करू” अशी धमकी देत ब्लॅकमेलिंग करून लुटमार केल्याचा आरोपही करण्यात आला आहे. या प्रकरणी नांदेड सिटी पोलिसांनी दोन आरोपींना अटक केली आहे.
नेमका प्रकार काय?
पोलिसांनी दिलेल्या माहितीनुसार, फिर्यादी बुधवार पेठेत गेले असता, आयुष राजू चौगुले आणि सदफ पठाण या दोन आरोपींनी त्यांचा पाठलाग केला. हे दोघं थेट त्यांच्या घरापर्यंत गेले आणि तेथे “तुम्ही आम्हाला २० हजार रुपये ऑनलाईन देत आहात, पण आधी कॅश द्या” असं सांगितलं. प्रत्यक्षात ऑनलाईन काहीही न टाकता, उलट “तुम्ही बुधवार पेठेत गेलात हे आम्ही सगळ्यांना सांगू, तुमची बदनामी करू” असा धमकीवजा इशारा देत त्यांच्याकडून पैसे उकळले.
या धमकीने घाबरलेला फिर्यादी काहीच न बोलता गप्प राहिला, परंतु आरोपी इथंही थांबले नाहीत. त्यांनी थेट पोलीस हेल्पलाइनवर कॉल करून उलट फिर्यादीविरोधातच “आम्ही त्यांना ऑनलाईन पैसे दिले आणि त्यांनी फसवणूक केली” अशी तक्रार करण्याचा प्रयत्न केला.
दरम्यान, नांदेड सिटी पोलिसांनी घटनास्थळी तात्काळ धाव घेतली. घटनेची सखोल चौकशी केली असता, हा प्रकार बनावट असल्याचे आणि आरोपीच खोटं बोलून पैशांची उकळपट्टी करत असल्याचे निष्पन्न झाले. त्यानंतर पोलिसांनी दोघांना अटक केली असून, पुढील तपास सुरू आहे.
