डॉ. अशोक बालगुडे
सोलापूर: निवडणूक आयोगाच्या निर्णयप्रक्रियेपासून मतदार यादीतील नावे वगळण्यापर्यंतच्या मुद्द्यांवर प्रश्न उपस्थित करत मतदानाशी संबंधित डिजिटल माहिती सार्वजनिक करण्याची मागणी करण्यात आली. आयोगाच्या कारभाराची चौकशी करून कथित अनियमितता आढळल्यास संबंधितांवर कायदेशीर कारवाई करावी, अशी मागणीही करण्यात आली. मुख्य निवडणूक आयुक्त ज्ञानेश कुमार यांच्या भूमिकेवरही प्रश्न उपस्थित करण्यात आले.
भारतीय न्याय संहितेतील (BNS) तरतुदींच्या आधारे त्यांच्याविरोधात तक्रार दाखल करता येऊ शकते, असा दावा करण्यात आला. हे आरोप शिवसेना (उद्धव बाळासाहेब ठाकरे) पक्षाच्या नेत्या सुषमा अंधारे यांनी सोलापुरात पत्रकार परिषदेत केले.
आयोगातील निर्णयप्रक्रियेसंदर्भात २०२३ च्या कायद्यातील तरतुदींचा संदर्भ देत अंधारे यांनी आयोगातील सदस्यांच्या भूमिकेवर प्रश्न उपस्थित केले. निवडणूक प्रक्रियेबाबत उपस्थित होत असलेल्या शंकांचे निरसन करण्यासाठी संबंधित माहिती सार्वजनिक करावी, अशी मागणी त्यांनी केली.
विशेष सखोल पुनरावलोकनाच्या (SIR) प्रक्रियेत मतदारांची नावे चुकीच्या पद्धतीने वगळली गेल्याचा दावा करत, संबंधित नागरिकांनी पोलिसांकडे तक्रारी दाखल कराव्यात, असे आवाहन अंधारे यांनी केले. मतदान केंद्राशी संबंधित उपलब्ध डिजिटल माहिती सार्वजनिक केल्यास निवडणूक प्रक्रियेबाबतचे प्रश्न स्पष्ट होतील, असा दावाही त्यांनी केला.
दरम्यान, दुष्काळाच्या प्रश्नावरून अंधारे यांनी मुख्यमंत्री देवेंद्र फडणवीस यांच्या सोलापूर दौऱ्यावरही टीका केली. शेतकरी आणि पिकांच्या नुकसानीची तातडीने दखल घेऊन मदत जाहीर करावी, अशी मागणी त्यांनी केली.
अंधारे यांनी केलेले आरोप व दावे हे त्यांचे राजकीय मत असून, त्यातील कायदेशीर दाव्यांची स्वतंत्र न्यायालयीन पुष्टी झाल्याचे या वृत्तातून गृहीत धरलेले नाही. निवडणूक आयोग आणि राज्य सरकारची बाजू उपलब्ध झाल्यास तीही प्रसिद्ध केली जाईल.
