पुणे: गणेश विसर्जनासाठी शहरातील रस्त्यांवर मोठी गर्दी झाली असताना, गर्दीचा फायदा घेऊन चोरी आणि दरोडा टाकण्याच्या तयारीत असलेल्या एका टोळीचा शिवाजीनगर पोलिसांनी पर्दाफाश केला. पोलिसांनी कारवाई करत 11 संशयितांना ताब्यात घेतले असून त्यांच्याकडून 63 महागडे मोबाईल फोन, एक चारचाकी आणि दरोड्यासाठी वापरले जाणारे साहित्य जप्त केले आहे. जप्त मुद्देमालाची एकूण किंमत सुमारे 30 लाख 57 हजार रुपये असल्याचे सांगण्यात आले.
अब्दुल कादिर नूर महंमद (28), अब्दुल मालिक अब्दुल खालीक (22), झीआउर रहमान अताउर रहमान शौकत हुसेन (26), महंमद असवद महंमद अजमल (31), फैसल अजीज खान (24), हुजेफा अंजुम महंमद साजिद अन्सारी (30), जुबेर अहमद मुख्तार अहमद (35), अझर अहमद अल्लाफ अहमद मोमीन (30), नावेद अख्तार शफीक अहमद अन्सारी (33), अतहर अहमद एजाज अहमद (23) आणि अतुल मारोती इंगळे (24) अशी आरोपींची नावे आहेत.
पोलिसांना मिळालेल्या गुप्त माहितीनुसार, गणेश विसर्जनाची मिरवणूक सुरू असताना मुठा नदीपात्रात काही जण शस्त्रांसह एकत्र जमले होते. गर्दीचा फायदा घेत दरोडा टाकण्याची त्यांची तयारी असल्याची माहिती पोलीस उपनिरीक्षक अरविंद शिंदे यांना मिळाली. त्यानंतर पोलीस निरीक्षक अमर काळगे यांच्या मार्गदर्शनाखाली पथकाने तातडीने नदीपात्रात धाव घेत कारवाई केली.
पोलिसांनी संशयितांना घेरून ताब्यात घेतल्यानंतर त्यांची झडती घेण्यात आली. त्यावेळी त्यांच्याकडे धारदार सुऱ्या, कटर, दोरी आणि मिरचीपूड आढळून आली. गर्दीत नागरिकांच्या डोळ्यात मिरचीपूड टाकून त्यांच्याकडील वस्तू लुटण्याची तयारी असल्याचा पोलिसांचा संशय आहे.
तपासात या आरोपींकडे विविध नामांकित कंपन्यांचे 63 महागडे स्मार्टफोन आणि एक चारचाकी वाहनही सापडले. हे मोबाईल यापूर्वी गर्दीतून चोरले असल्याची माहिती तपासातून समोर आली आहे. अटक केलेल्या आरोपींपैकी 10 जण मालेगाव, नाशिक येथील असून एक आरोपी वाशीम जिल्ह्यातील गिरोली येथील असल्याचे पोलिसांनी सांगितले. या टोळीने विसर्जनाच्या गर्दीत आणखी किती नागरिकांना लक्ष्य केले आहे, याचा तपास शिवाजीनगर पोलीस करत आहेत.
