करमाळा: तालुक्यातील कुंभारगाव व कर्जत तालुक्यातील राशीन या दोन तालुक्यांना जोडणाऱ्या शिवेवर बिबट्याचा वावर आढळून आल्याने परिसरात खळबळ उडाली आहे. आज सकाळच्या सुमारास काही नागरिकांना शिवेच्या कडेला बिबट्याचे दर्शन झाले. यानंतर ही माहिती ग्रामस्थांनी तातडीने वनविभाग व ग्रामपंचायतीला कळवली.
बिबट्याचा वावर शेतशिवारात तसेच वस्तीच्या जवळ दिसून आल्याने शेतकरी व नागरिकांमध्ये भीतीचे वातावरण आहे. विशेषतः सकाळी व सायंकाळी शेतात जाणारे शेतकरी, महिला व शाळेत जाणारी मुले यांना अधिक काळजी घेण्याचे आवाहन करण्यात आले आहे.
वनविभागाच्या कर्मचाऱ्यांनी परिसरात पाहणी करून नागरिकांना सतर्क राहण्याच्या सूचना दिल्या आहेत. रात्री अनावश्यक बाहेर पडू नये, लहान मुलांना एकटे सोडू नये, तसेच बिबट्याचे दर्शन झाल्यास घाबरून न जाता त्वरित वनविभागाशी संपर्क साधावा, असे आवाहन करण्यात आले आहे.
दरम्यान, ग्रामस्थांनीही एकत्रितपणे सावधगिरी बाळगण्याचा निर्णय घेतला असून, शिवेच्या परिसरात लक्ष ठेवण्यासाठी स्थानिक पातळीवर समन्वय साधण्यात येत आहे. वनविभागाकडून पुढील उपाययोजना लवकरच राबवण्यात येणार असल्याची माहिती देण्यात आली आहे.
