सातारा: साताऱ्यात लोकसभा खासदार उदयनराजे भोसले आणि सार्वजनिक बांधकाम मंत्री शिवेंद्रराजे भोसले यांनी सातारा नगरपालिकेच्या नगरसेवकांची महत्त्वाची बैठक घेतली. या बैठकीत पालिकेच्या कामकाजात कोणताही गोंधळ किंवा हलगर्जीपणा सहन केला जाणार नाही, असा स्पष्ट इशारा दोन्ही नेत्यांनी दिला. शहरातील विविध विकासकामे, समन्वय आणि निधी नियोजनावर या बैठकीत चर्चा करण्यात आली.
यावेळी बोलताना खासदार उदयनराजे भोसले यांनी ‘मुख्यमंत्री माझी लाडकी बहीण’ योजनेबाबतही भाष्य केले. त्यांनी सांगितले की, शासनाच्या विविध योजनांमुळे निधीवर ताण निर्माण झाला असून काही ठिकाणी अपेक्षित प्रमाणात फंडिंग मिळत नाही. त्यामुळे उपलब्ध निधीचे योग्य नियोजन करून विकासकामे कशी मार्गी लावता येतील, यासाठी ही बैठक आयोजित करण्यात आली होती.
उदयनराजे भोसले म्हणाले की, सातारा शहरातील विविध वॉर्ड, प्रभाग आणि हद्दवाढीत समाविष्ट भागांतील कामे गतीने पूर्ण करण्यासाठी प्रशासन आणि नगरसेवकांमध्ये समन्वय आवश्यक आहे. नव्याने निवडून आलेल्या नगरसेवकांना मुख्याधिकारी आणि विभागप्रमुखांनी योग्य सहकार्य व मार्गदर्शन करावे, अशा सूचनाही देण्यात आल्या.
तसेच शहरातील अतिक्रमण रोखणे, वाहतूक कोंडी टाळण्यासाठी हॉकर्स झोन तयार करणे आणि नागरिकांच्या दैनंदिन अडचणी सोडवण्यासाठी नियोजनबद्ध काम करण्याचे निर्देशही बैठकीत देण्यात आले. उदयनराजे आणि शिवेंद्रराजे भोसले यांनी विकासकामांमध्ये राजकारण किंवा मतभेद न आणता नागरिकांच्या अपेक्षा पूर्ण करण्यावर भर दिला.
युद्धजन्य परिस्थिती, वाढती महागाई आणि आर्थिक ताण यामुळे नागरिकांपुढे उपजीविकेची चिंता वाढली आहे. अशा काळात लोकप्रतिनिधींनी अधिक जबाबदारीने काम करणे गरजेचे असल्याचेही उदयनराजे भोसले यांनी नमूद केले. निधीचे योग्य नियोजन करून विकासकामे मार्गी लावण्यासाठी पुढील काळात समन्वयाने काम करण्याचा निर्धार या बैठकीत व्यक्त करण्यात आला.
