सोलापूर : शेतात कष्ट करून कुटुंबाला हातभार लावणाऱ्या अवघ्या 22 वर्षीय तरुण शेतकऱ्याचा सर्पदंशामुळे दुर्दैवी मृत्यू झाला. रूपेश नागनाथ चव्हाण असे मृत तरुणाचे नाव असून, 6 ऑक्टोबर रोजी वागदरी गावातील शेतात ही घटना घडली. रूपेशच्या अचानक झालेल्या मृत्यूने चव्हाण कुटुंबावर दुःखाचा डोंगर कोसळला असून, गावातही हळहळ व्यक्त होत आहे.
मिळालेल्या माहितीनुसार, रूपेश मंगळवारी वडिलांसोबत शेतात काम करत होता. पिकांना पाणी दिल्यानंतर तो काही वेळ आराम करण्यासाठी शेतातील झाडाखाली जाऊन झोपला. याच वेळी झोपेत असताना विषारी सापाने त्याला दंश केला. काही वेळाने रूपेश बेशुद्ध झाल्याचे लक्षात येताच वडील नागनाथ यांनी तातडीने त्याला उपचारासाठी नळदुर्ग येथील सरकारी रुग्णालयात दाखल केले.
रूपेशची प्रकृती गंभीर असल्याने डॉक्टरांनी त्याला पुढील उपचारासाठी सोलापूरच्या शासकीय रुग्णालयात हलवण्याचा निर्णय घेतला. मुलाला वाचवण्याच्या प्रयत्नात वडिलांनी त्याला दंश केलेला सापही रुग्णालयात सोबत आणला. मात्र, सोलापूर येथे पोहोचण्यापूर्वीच रूपेशची प्रकृती अधिक खालावली होती.
डॉक्टरांनी तपासणी केल्यानंतर रूपेशला उपचार सुरू करण्यापूर्वीच मृत घोषित केले. त्याच्या पश्चात आई, वडील, भाऊ आणि बहीण असा परिवार आहे. या घटनेची नोंद सिव्हिल पोलिस चौकीत करण्यात आली आहे.
