अहमदनगर : अवकाळी पाऊस काही केल्या शेतकऱ्यांची पाठ सोडताना दिसत नाही. महिनाभरापूर्वीच अवकाळीच्या तडाख्यात सापडलेल्या पिकांना शुक्रवारी पुन्हा एकदा पावसाने झोडपले. अहमदनगर शहर, तालुका व जिल्ह्याच्या अनेक भागांत शुक्रवारी रात्री अवकाळी पावसाने हजेरी लावली.
राज्यभरात दोन दिवसांपूर्वीच अवकाळी पावसाची शक्यता हवामान खात्याने वर्तवली होती. त्यानुसार शुक्रवारी दिवसभर ढगाळ वातावरण होते. अनेक ठिकाणी सूर्य ही दिसला नाही. याशिवाय थंड वारेही वाहत होते. दरम्यान, शुक्रवारी रात्री आठच्या सुमारास नगर शहरासह नगर तालुका परिसरात तासभर जोरदार पावसाने हजेरी लावली. शिवाय कुकाणा व जिल्ह्याच्या काही भागात हलक्या सरी कोसळल्या.
