अहमदनगर : पारनेर तालुक्यातील चोंभूत गावातून एक धक्कादायक घटना समोर येरत आहे. सासूच्या डोक्यात दगड घालून जावयाने तिचा खून केला होता. त्यानंतर पोटच्या मुलाने बापाचा खून करून आजीच्या खुनाचा बदला घेतल्याचा धक्कादायक प्रकार उघडकीस आला आहे. याप्रकरणी मुलगा सुभाष संतोष शेंडगे याला अटक करण्यात आल्याची माहिती पोलिस निरीक्षक संभाजी गायकवाड यांनी दिली आहे.
नेमकं प्रकरण काय?
दरम्यान, पती-पत्नीच्या वादातून जावई संतोष दौलत शेंडगे (रा. शिरसुले, ता. पारनेर) याने सासू राधाबाई महादू चोरमले (रा. चोंभूत, ता. पारनेर) हिच्या डोक्यात दगड घालून तिचा निर्घृण खून केला. राधाबाई यांचा खून करण्यात आल्याचे नातेवाईकांना माहिती दिली. त्यानंतर मेंढ्यांच्या वाड्यावर असलेल्या संतोष शेंडगे आणि बानुबाई संतोष शेंडगे यांचा मुलगा सुभाष शेंडगे हा देखील तिथे आला.
आजी राधाबाईच्या डोक्यात दगड घातल्याने तिचा मृत्यू झालेला असतानाही, संतोष हा शिवीगाळ करत होता. त्यामुळे संतप्त झालेल्या सुभाषने लाकडी दांडक्याने वडिलांच्या डोक्यात मागील बाजूस बेदम मारहाण केली. यामुळे संतोषच्या डोक्यातून रक्तस्त्राव सुरू झाला आणि तो जाग्यावरच पडला. राधाबाई चोरमले आणि संतोष शेंडगे यांना रुग्णालयात दाखल करण्यात आलं मात्र राधाबाई यांना मृत घोषित केले. तर, संतोष यास पुढील उपचारासाठी नगर येथे दाखल करण्यात आलं असता त्याचा सोमवारी रात्री मृत्यू झाला.
