पंढरपूर: माळशिरस तालुक्यातील (Crime News) वाफेगाव परिसरात उसाच्या (Pandharpur News) शेताजवळ झालेल्या खून प्रकरणात जिल्हा व सत्र न्यायालयाने ऐतिहासिक निकाल देत आरोपी शंकर सरवदे याला जन्मठेपेची शिक्षा सुनावली आहे. फिर्यादी मोहन बनसोडे यांच्या पत्नीचे चुलत भाऊ आरोपी शंकर सरवदे याच्यासोबत अनैतिक संबंध होते. घटनेच्या अंदाजे महिनाभर अगोदर पीडित महिलेने हे संबंध पूर्णपणे तोडले होते. संबंध तोडल्यानंतरही आरोपी तिच्यावर दबाव टाकत होता आणि नकार दिल्यास जीवे मारण्याची धमकी देत होता. (Breaking News)
19 सप्टेंबर 2022 रोजी मोहन बनसोडे कामानिमित्त बाहेर असताना आरोपीने महिलेला शेतात नेले. तिथे तिच्याशी संबंध ठेवून त्यानंतर गळा आवळून हत्या केली. पुरावा नष्ट करण्यासाठी आरोपीने मृतदेह नग्न अवस्थेत टाकला आणि तिचे कपडे दूर नेऊन फेकून दिले. या प्रकरणाची तक्रार अकलूज पोलीस स्टेशनमध्ये दाखल झाली. तपासादरम्यान आरोपीने खुनाचे ठिकाण स्वतः दाखवून दिले. तसेच जप्त कपड्यांच्या रासायनिक विश्लेषणातून आरोपीच्या कपड्यांवर रक्ताचे डाग आढळले आणि हा विशेष पुरावा ठरला.
या प्रकरणाची सुनावणी जिल्हा व सत्र न्यायाधीश मे. एल.डी. हुली यांच्या न्यायालयात झाली. खटल्यादरम्यान एकूण 15 साक्षीदारांची साक्ष नोंदवण्यात आली. यात फिर्यादीची आई, प्रत्यक्षदर्शी साक्षीदार आणि तपास अधिकारी यांचा समावेश होता. न्यायालयाने आरोपीला भारतीय दंड विधानाच्या कलम 302 अंतर्गत आजीवन कारावास आणि 2000 रुपये दंड, तर कलम 201 अंतर्गत तीन वर्षे सश्रम कारावास आणि 1000 रुपये दंड अशी शिक्षा सुनावली आहे. दंड न भरल्यास दोन्ही शिक्षांना पर्यायी तुरुंगवासाची तरतूदही करण्यात आली. या खटल्यात सरकारी पक्षाची बाजू ॲड. संग्राम पाटील, ॲड. एस.ए. ढवळे आणि ॲड. एस.टी. मेवेगिरी यांनी मांडली, तर फिर्यादीच्या वतीने ॲड. जी.पी. कदम यांनी साहाय्य केले.
