अहिल्यानगर: अहिल्यानगर जिल्ह्यातील शिर्डी (Ahilyanagar Crime) येथे तरुणाचे अपहरण करून निर्घृण हत्या करण्यात आल्याची धक्कादायक घटना उघडकीस (Nagar News) आली आहे. हत्या केल्यानंतर (Pune Crime) मृतदेह टायर आणि डिझेलच्या सहाय्याने जाळून पुरावे नष्ट करण्यात आल्याची माहिती तपासात समोर आली आहे. या प्रकरणी अहिल्यानगर स्थानिक गुन्हे शाखेच्या पथकाने सराईत गुन्हेगार दिपक पोकळे, प्रविण वाघमारे आणि त्यांच्या इतर साथीदारांना अटक केली आहे. अनैतिक संबंध आणि पैशांच्या वादातून ही हत्या करण्यात आल्याची कबुली आरोपींनी पोलिसांसमोर दिली आहे. (Latest Marathi News)
मिळालेल्या माहितीनुसार, 10 डिसेंबर 2025 रोजी शिर्डी येथील सचिन कल्याणराव गिधे यांचे अपहरण करण्यात आले होते. सचिन हा साई सुनिता हॉटेल, शिर्डी येथे गेल्यानंतर घरी परत न आल्याने त्याच्या पत्नी श्रध्दा गिधे यांनी 15 डिसेंबर 2025 रोजी राहाता पोलीस ठाण्यात फिर्याद दिली होती. या फिर्यादीवरून प्रविण उर्फ पचास वाघमारे आणि दिपक अंबादास पोकळे यांच्याविरोधात अपहरणाचा गुन्हा दाखल करण्यात आला होता. दरम्यान, अपहरणानंतर आरोपी सातत्याने ठिकाणे बदलत पोलिसांना गुंगारा देत होते.
तपासादरम्यान आरोपींनी सचिन गिधे याची हत्या करून मृतदेह जाळल्याची माहिती पोलिसांना दिली. दिपक पोकळे हा कुख्यात गुन्हेगार असून त्याच्यावर याआधी मोक्का, खून, खुनाचा प्रयत्न, अपहरण, दरोडे आणि जबरी चोरीसारखे गंभीर गुन्हे दाखल आहेत. या प्रकरणात आणखी गुन्हे उघडकीस येण्याची शक्यता पोलिसांनी व्यक्त केली आहे.
दरम्यान, प्रविण वाघमारे याने याच दिवशी आणखी एक गंभीर गुन्हा केल्याचे तपासात निष्पन्न झाले आहे. 10 डिसेंबर 2025 रोजी गौतम कैलास निकाळे या तरुणाला घरातून फसवणुकीने बाहेर नेऊन उपासने बाबा मंदिराच्या पाठीमागील परिसरात नेऊन लाथा-बुक्क्यांनी आणि दगडाने मारहाण करून त्याचा पाय फ्रॅक्चर करण्यात आला होता. या प्रकरणी शिर्डी पोलीस ठाण्यात स्वतंत्र गुन्हा दाखल आहे.
अपहरित तरुणाचा शोध न लागल्याने सोमनाथ घार्गे यांनी स्थानिक गुन्हे शाखेला तपासाचे आदेश दिले होते. त्यांच्या मार्गदर्शनाखाली आणि स्थानिक गुन्हे शाखेचे पोलीस निरीक्षक किरणकुमार कबाडी यांच्या नेतृत्वाखाली पथक तयार करण्यात आले. या पथकाने संगमनेर तालुक्यातील मेंढवण परिसरात सापळा रचून आरोपींना मोठ्या शिताफीने अटक केली. सध्या या हत्येचा पुढील तपास राहाता पोलीस करत असून संपूर्ण प्रकरणामुळे परिसरात खळबळ उडाली आहे.
