नाशिक: नाशिक-कळवण महामार्गावर बुधवारी रात्री एक अत्यंत भीषण अपघात घडला असून, भरधाव वेगात असलेली कार थेट एका बंगल्यात घुसल्यामुळे दोन कुटुंबांतील पाच जणांचा जागीच मृत्यू झाला आहे. या अपघातात दोन जण गंभीर जखमी झाले असून, त्यांच्यावर सध्या नाशिक येथील रुग्णालयात उपचार सुरू आहेत. कोल्हापूर फाट्यावर रात्री १० वाजताच्या सुमारास हा हृदयद्रावक अपघात घडला.
नामपूर येथील भदाण कुटुंब आणि देवळा येथील मेतकर कुटुंब नाशिक येथे नातेवाईकाच्या लग्नासाठी आले होते. लग्नसमारंभ आटोपून सर्वजण एका कारमधून सटाण्याकडे परत जात होते. मात्र, कोल्हापूर फाट्याजवळ चालकाचा वाहनावरील ताबा सुटला आणि भरधाव वेगात असलेली कार थेट रस्त्यालगत असलेल्या विठोबा शंकर अहेर यांच्या बंगल्यात घुसली. कारने बंगल्याच्या सिमेंटच्या खांबाला जबर धडक दिली आणि खांब वाकवून कार आतमध्ये शिरली. या धडकेचा आवाज इतका जबरदस्त होता की परिसरातील लोकांनी तातडीने घटनास्थळी धाव घेतली.
पाच जणांचा जागीच मृत्यू
या भीषण अपघातात कार चालक आणि चार प्रवाशांचा जागीच मृत्यू झाला. मृतांमध्ये खालिक मेहमूद पठाण (५०, रा. नामपूर, ता. सटाणा), माधवी मेतकर (३२, रा. देवळा), त्यांची चिमुरडी मुलगी त्रिवेणी मेतकर (४), शैला वसंत भदाण (६२) आणि सरला भालचंद्र भदाण (५०) यांचा समावेश आहे. या अपघातात उत्कर्ष मेतकर (१२, रा. देवळा) आणि भालचंद्र भदाण (५२, रा. नामपूर) हे गंभीर जखमी झाले असून, त्यांच्यावर प्राथमिक उपचार केल्यानंतर नाशिक येथील रुग्णालयात हलविण्यात आले आहे.
अपघात घडल्यानंतर आजूबाजूच्या रहिवाशांनी तातडीने मदतीसाठी धाव घेतली. कारमधील जखमी व अडकलेल्यांना बाहेर काढून तात्काळ रुग्णालयात दाखल करण्यात आले. अपघाताच्या तीव्रतेवरून हा थरकाप उडवणारा क्षण होता, असे प्रत्यक्षदर्शींनी सांगितले. स्थानिक पोलीस आणि आपत्कालीन सेवांनी तत्काळ घटनास्थळी पोहचून बचावकार्य केले.या अपघाताने भदाण आणि मेतकर कुटुंबांवर दुःखाचा डोंगर कोसळला आहे. आनंदी क्षण साजरे करून परतणाऱ्या या कुटुंबांचे आयुष्य एका क्षणात उध्वस्त झाले. विशेषतः एका छोट्या चिमुकलीच्या मृत्यूमुळे वातावरण अधिकच हळहळजनक झाले आहे. संपूर्ण नामपूर, देवळा आणि सटाणा परिसरात शोककळा पसरली आहे.
