पुणे :नोकरी-व्यवसायामुळे आठवडाभर वेळेची ओढाताण होत असल्याने नागरिक सहसा पहिल्या, तिसऱ्या आणि पाचव्या शनिवारी बँक कामांसाठी गर्दी करतात. दुसऱ्या आणि चौथ्या शनिवारी तर बँकांना अधिकृत सुट्टी असतेच. मात्र, आता प्रायव्हेट बँकेतील कर्मचाऱ्यांनी सर्वच शनिवारी आणि रविवारी सुट्टी देऊन आठवड्यातून फक्त ५ दिवस (सोमवार ते शुक्रवार) कामकाज ठेवण्याची मागणी लावून धरली आहे. त्यामुळे सामान्य ग्राहकांचे बँकेचे व्यवहार कसे होणार, असा प्रश्न उपस्थित होत आहे.
खासगी बँका स्वतःहून सुट्टी जाहीर करू शकतात का?
अनेक ग्राहकांना असे वाटते की ,प्रायव्हेट बँका स्वतःच्या मर्जीने सुट्ट्या ठरवू शकतात. परंतु हे पूर्णपणे चुकीचे आहे. बँक खासगी असो वा सरकारी, सर्वांनाच भारतीय रिझर्व्ह बँकेच्या (RBI) नियमावलीनुसार काम करावे लागते. त्यामुळे RBI आणि केंद्र सरकारची रीतसर परवानगी मिळाल्याशिवाय कोणत्याही बँकेला प्रत्येक शनिवारी बंद ठेवता येत नाही.
या प्रस्तावाचे पुढे काय झाले?
बँकिंग क्षेत्रात ५ दिवसांच्या कामकाजाची चर्चा गेल्या काही काळापासून सुरु आहे. इंडियन बँक्स असोसिएशनने (IBA) २०२४ मध्ये या संदर्भातील प्रस्तावाला मंजुरी देऊन तो मंजुरीसाठी सरकारकडे पाठवला होता. मात्र, अद्याप यावर केंद्र सरकार किंवा रिझर्व्ह बँकेकडून कोणताही अंतिम निर्णय झालेला नाही. त्यामुळे हा नियम सध्या लागू झालेला नाही.
ग्राहकांसाठी महत्त्वाची गोष्ट
जोपर्यंत या प्रस्तावावर सरकारची अधिकृत मोहर उमटत नाही, तोपर्यंत जुनीच व्यवस्था कायम राहील. म्हणजेच, नेहमीप्रमाणे महिन्याचा पहिला, तिसरा आणि पाचवा शनिवार बँकांच्या कामकाजाचाच राहील. त्यामुळे ग्राहकांनी सध्या तरी सर्व शनिवारी बँक बंद राहील असा गैरसमज करून घेऊ नये आणि आपले नियोजित व्यवहार त्यानुसारच पूर्ण करावेत.
