पुणे : ‘मला भाऊच म्हणायचे, माझ्यापेक्षा मोठे व्हायचे नाही. तुला माझ्याशी दुश्मनी घ्यायची आहे का? मला ओळख देत नाहीस,’ असे म्हणत तरुणाच्या अंगावर कुत्रा सोडून त्याला मारहाण केल्याची घटना बिबवेवाडी परिसरात घडली आहे. तसेच तरुणाच्या खिशातील रोकड जबरदस्तीने काढून घेतल्याचा आरोप आहे. या प्रकरणी बिबवेवाडी पोलिसांनी तिघांविरुद्ध जबरी चोरीचा गुन्हा दाखल केला आहे.
याबाबत ओंकार शाहुराज जाधव (वय २७, रा. पोकळे वस्ती, बिबवेवाडी) यांनी पोलिसांकडे फिर्याद दिली आहे. त्यानुसार उत्तम कांबळे (वय २७), निलेश कुडले (वय २५) आणि मनिष शेळके (वय २५, सर्व रा. पापळ वस्ती, बिबवेवाडी) यांच्याविरुद्ध गुन्हा दाखल करण्यात आला आहे. ही घटना ३० सप्टेंबर रोजी पहाटे तीनच्या सुमारास बिबवेवाडीतील बकुळ हॉल आणि पापळ वस्ती गणपती मंदिराजवळ घडल्याचे फिर्यादीत नमूद आहे.
पोलिसांनी दिलेल्या माहितीनुसार, ओंकार जाधव हे २९ सप्टेंबर रोजी मोगरवाडी येथे कार्यक्रमासाठी गेले होते. कार्यक्रम आटोपून ते ३० सप्टेंबर रोजी पहाटे दुचाकीवरून घरी परतत होते. त्यावेळी उत्तम कांबळे याने त्यांना आवाज देऊन थांबवले. दोघांमध्ये बोलताना ‘तू मला उत्तम म्हणणार का?’ असे म्हणत कांबळे याने ‘भाऊच म्हणायचे, माझ्यापेक्षा मोठे व्हायचे नाही’ असे सांगितल्याचे तक्रारीत म्हटले आहे.
त्यानंतर ‘तुला माझ्याशी दुश्मनी घ्यायची आहे का? मला ओळख देत नाहीस,’ असे म्हणत कांबळे याने जाधव यांच्या कानाखाली मारल्याचा आरोप आहे. त्यानंतर जवळ असलेल्या कुत्र्याला ‘धर ह्याला’ असे सांगितल्यावर कुत्र्याने जाधव यांच्या दोन्ही पायांना चावा घेतल्याचे फिर्यादीत नमूद आहे. कांबळे यानेही हाताने मारहाण केली. तसेच कोणाला तरी फोन करून ‘लवकर या, एकाला मारायचं आहे,’ असे सांगितल्याचे तक्रारीत म्हटले आहे.
या प्रकरणाचा पुढील तपास बिबवेवाडी पोलीस करत आहेत.
