पंढरपूर: सोलापूर जिल्ह्यातील पंढरपूर तालुक्यातून एक अत्यंत धक्कादायक आणि मन सुन्न करणारी घटना समोर आली आहे. पटवर्धन कुरोली येथील एका लैंगिक अत्याचार पीडित तरुणीने मृत्यूशी दिलेली तब्बल दीड महिन्यांची झुंज अखेर अपयशी ठरली आहे. सोलापूर येथील रुग्णालयात उपचारादरम्यान या पीडितेने शेवटचा श्वास घेतला. या दुर्दैवी घटनेमुळे संपूर्ण सोलापूर जिल्ह्यात तीव्र संतापाची लाट उसळली आहे.
मिळालेल्या माहितीनुसार, गावातीलच एका नराधमाने केलेल्या अत्याचारानंतर या तरुणीने प्रचंड मानसिक धक्क्यातून ॲसिड प्राशन करून आत्महत्या करण्याचा प्रयत्न केला होता. या प्रकरणी ११ एप्रिल रोजी करकम पोलीस ठाण्यात गुन्हा दाखल करण्यात आला होता. यानंतर तिला वाचवण्यासाठी पुण्यातील दीनानाथ मंगेशकर रुग्णालयासारख्या अनेक बड्या रुग्णालयात अतिदक्षता विभागात उपचार सुरू होते. मात्र, अंतर्गत अवयवांना गंभीर इजा झाल्यामुळे तिची प्राणज्योत मावळली.
पीडितेच्या मृत्यूनंतर संतप्त आणि आक्रमक झालेल्या कुटुंबीयांनी पोलिसांच्या कार्यपद्धतीवर गंभीर प्रश्न उपस्थित केले आहेत. गुन्हा दाखल होऊन इतके दिवस उलटले तरी आरोपीला अटक का झाली नाही, असा सवाल करत नातेवाईकांनी तरुणीचा मृतदेह थेट रुग्णवाहिकेतून करकम पोलीस ठाण्याच्या आवारात आणला. जोपर्यंत नराधम आरोपीला बेड्या ठोकल्या जात नाहीत आणि पीडितेच्या कुटुंबाला न्याय मिळत नाही, तोपर्यंत मृतदेहावर अंत्यसंस्कार करणार नाही, अशी ठाम भूमिका कुटुंबीयांनी घेतली.
रविवारी रात्री मृतदेह पोलीस ठाण्यात ठेवला होता. अखेर वरिष्ठ पोलीस अधिकाऱ्यांनी मध्यस्थी केली. आरोपीला तातडीने अटक करण्याचे श्वासन दिल्यानंतर नातेवाईकांनी आंदोलन मागे घेतले आणि मृतदेह शवविच्छेदनासाठी पाठवला. दरम्यान, या प्रकरणाचा पुढील तपास पोलीस करत आहेत.
