पाचगणी / लहू चव्हाण : स्वच्छ भारत अभियान २०२३ सर्वेक्षणात प्रशासकीय राजवटीतही पाचगणी गिरिस्थान नगरपरिषदेने देश पातळीवर पश्चिम विभागात प्रथम क्रमांक पटकावला. पाचगणी नगरपरिषदेचे मुख्याधिकारी तथा प्रशासक निखिल जाधव यांचे सर्व स्तरातून कौतुक होत आहे.
केंद्र शासनाच्या गृहनिर्माण व शहरी विकास मंत्रालय यांच्या वतीने दिल्ली येथील भारत मंडपम या ठिकाणी पारितोषिक वितरण समारंभ गुरुवारी (दि.११) पार पडणार आहे. यासाठी पाचगणी गिरीस्थान नगरपरिषदेस निमंत्रित करण्यात आले आहे. गृहनिर्माण व शहरी विकास मंत्रालय यांच्या वतीने दरवर्षी स्वच्छता अभियान राबवले जाते. या अभियानांतर्गत केंद्र सरकारने नियुक्त केलेले पथक वेगवेगळ्या निकषानुसार सर्वेक्षण करते व देशपातळीवर आणि राज्यपातळीवर विभागनिहाय क्रमांक दिले जातात.
‘स्वच्छ सर्वेक्षण २०२३’ साठी पाचगणी गिरीस्थान नगरपरिषदेस पश्चिम विभागात प्रथम क्रमांक प्राप्त झाला असून, या निमित्ताने नगरपरिषदेचे कार्यक्षम प्रशासक तथा मुख्याधिकारी निखिल जाधव यांनी या कामगिरीबद्दल पाचगणी शहरातील नागरिकांचे तसेच स्वच्छता कर्मचाऱ्यांचे आणि सर्व पालिका कर्मचारी यांचे विशेष आभार मानले.
