नागपूर : उद्धव ठाकरे यांनी भारतीय जनता पक्षाशी गद्दारी केली नसती तर महाराष्ट्रात राष्ट्रवादी काँग्रेसला आम्ही सोबतच घेतले नसते. परंतु, आता राज्यात महायुती असल्यामुळे आगामी निवडणुकीत महायुती म्हणून निवडणूक लढणार आहोत. राज्यातील ४८ पैकी ४५ पेक्षा अधिक जागेवर विजयी होऊ, असे मत भाजपचे राष्ट्रीय सरचिटणीस विनोद तावडे यांनी व्यक्त केले. भारतीय जनता पक्षाच्या प्रदेश कार्यकारिणीच्या बैठकीच्या निमित्ताने विनोद तावडे नागपुरात आले असता ते प्रसार माध्यमांशी बोलत होते.
पंतप्रधान नरेंद्र मोदी यांच्या नेतृत्वाखालील शिवसेना- भाजप युतीचे सर्वाधिक उमेदवार निवडून आले होते. मात्र, उद्धव ठाकरे यांनी भाजपसोबत गद्दारी केल्यामुळे एकनाथ शिंदे त्यातून बाहेर पडले. राज्यात शिंदे- फडणवीस सरकार असतानाच राष्ट्रवादीचे अजित पवार आमच्यासोबत आले. त्यावेळी जर उद्धव ठाकरे यांनी गद्दारी केली नसती, तर आज अजित पवार यांना सोबत घेतले नसते. राज्यात आगामी विधानसभा निवडणुकीत भारतीय जनता पक्ष सामूहिक नेतृत्वात निवडणूक लढणार आहे. या निवडणुकीनंतरच राज्याच्या मुख्यमंत्री पदाचा निर्णयही सामूहिकरित्या घेण्यात येईल. भाजपने २०१४ नंतर राजकारणाची दिशा बदलली असून येत्या लोकसभा निवडणुकीत भाजपचे लक्ष्य लोकसभेच्या चारशे जागांचे आहे, असंही तावडे म्हणाले.
