नागपूर: महाराष्ट्राची उपराजधानी नागपूरमध्ये सरकारी कर्मचाऱ्याला बिअर बारमध्ये बसून सरकारी फाईलींवर सह्या करणे चांगलेच महागात पडले आहे. या प्रकरणानंतर सरकारी कामांमधली बेफिकीरी पुन्हा एकदा समोर आली आहे. या घटनेचा व्हिडिओ व्हायरल झाल्यानंतर मुख्यमंत्री देवेंद्र फडणवीस यांनी गंभीर दखल घेत तात्काळ निलंबनाचे आदेश दिले आहेत. सरकारी कर्मचारी हे सार्वजनिक बांधकाम विभागातील उपअभियंता असून अधिकाऱ्याचे नाव देवानंद सोनटक्के आहे.
दोन दिवसांपूर्वी व्हायरल झालेल्या व्हिडिओमध्ये, सोनटक्के ठेकेदारासोबत बिअर पीत होते आणि त्याचवेळी ‘महाराष्ट्र शासन’ लिहिलेल्या महत्त्वाच्या फाईली तपासत आणि त्यावर सह्या करत होते. व्हिडीओमध्ये नागपूरमधील मनीष नगर येथील एका बिअर बारमध्ये दुपारी 3 च्या सुमारास तीन सरकारी अधिकारी बियर पीत टेबलावर शासकीय फाईली उघडून त्यांची पडताळणी करत सह्या करत होते. व्हिडीओमध्ये दिसत आहे कि, त्यांच्यासमोर फाईलींचा मोठा गठ्ठा होता. घटनेचा व्हिडिओ व्हायरल झाल्यानंतर अनेकजण प्रशासनाच्या कार्यपद्धतीवर प्रश्नचिन्ह उपस्थित करत आहे.
या प्रकरणाची बातमी माध्यमांनी उघडकीस आणल्यानंतर विरोधी पक्षांनी सरकारवर जोरदार टीका केली. या प्रकरणात महसूलमंत्री चंद्रशेखर बावनकुळे यांनी चौकशीचे आदेश दिले होते. दरम्यान, राज्याचे मुख्यमंत्री आणि गडचिरोली जिल्ह्याचे पालकमंत्री असलेले फडणवीस यांनी या प्रकरणाची गंभीर दखल घेतली. हा गंभीर प्रकार उघडकीस आल्यानंतर देवानंद सोनटक्के यांच्यावर निलंबनाची कारवाई करण्यात आली आहे.
