अमरावती : अमरावती जिल्ह्यातून बस अपघाताची घटना समोर आली आहे. अकोट तालुक्यातील सातपुडा पर्वतरांगातील मेळघाटमधील खटकालीजवळील ‘हाय पॉईंट’ जवळ बस दरीत कोसळली आहे. या बसमध्ये 25 से 30 प्रवासी प्रवास करत असल्याची प्राथमिक माहिती मिळत आहे. ही बस अकोटवरून मध्यप्रदेशच्या दिशेने जात होती. त्यावेळी ही दुर्घटना घडली.
याबाबत मिळालेल्या माहितीनुसार, अकोटवरून मध्यप्रदेशच्या दिशेने प्रवाशांनी भरलेली बस जात होती. सातपुडा पर्वतरांगात आकोट धारणी घाटात आली असता चालकाचे वाहनावरील नियंत्रण सुटल्याने बस थेट दरीत कोसळली. या अपघातात 6 जण गंभीर, तर 8 ते 10 जण किरकोळ जखमी झाले आहेत.
या घटनेची माहिती मिळताच घटनास्थळी अकोटवरून एकलव्य बचावपथक आणि रुग्णवाहिका तात्काळ दाखल झाल्या. जखमी प्रवाशांना तातडीने ग्रामीण रुग्णालयात दाखल करण्यात आले आहे. सुदैवाने बसमधील सर्व लहान मुलं सुरक्षित असल्याची माहिती आहे.
