मालेगाव (वाशीम): आंतरजातीय प्रेमविवाह केलेल्या मुलीचे तिच्या माहेरच्या मंडळीने सिनेस्टाइल अपहरण केल्याची घटना २२ मे रोजी दुपारी घडली. या प्रकरणी पोलिसांनी १६ जणांविरुद्ध गुन्हा दाखल केला आहे. मालेगाव शहरातील अकोला फाटास्थित गाडगेबाबानगरमध्ये वास्तव्यास असलेल्या कुटुंबातील मुलाचे आंतरजातीय मुलीशी प्रेमसंबंध जुळले आणि कुटुंबीयांच्या विरोधानंतरही त्याने प्रेमविवाह केला. मात्र, मुलीच्या घरच्यांचा आंतरजातीय विवाहाला विरोध असल्याने तेव्हापासून दोघेही मालेगाव येथील गाडगेबाबानगर येथे मुलाच्या घरी राहत होते.
दरम्यान, यापूर्वी मुलीचे आईवडील मुलीला घेण्यासाठी घरी आले होते. मात्र, ती सोबत न आल्याने २२ मे रोजी दुपारी मुलीचे आईवडील, भाऊ, काही महिला व पुरुष एमएच ३७ एडी ५७२२ या क्रमांकाच्या चारचाकी वाहनाने आले व त्यांनी नवविवाहितेचे हात पकडून ओढत घराबाहेर आणले व तिला वाहनात टाकून पोबारा केला. अशा तक्रारीवरून पोलिसांनी १६ जणांविद्ध गुन्हा दाखल केला आहे. ठाणेदार संजय चौधरी यांच्या मार्गदर्शनाखाली साहाय्यक पोलीस निरीक्षक संतोष इंगळे तपास करीत आहेत.
