थेऊर फाटा येथे रस्ता ओलांडताना भरधाव ट्रकची धडक; ‘झोमॅटो’ डिलिव्हरी बॉयचा उपचारादरम्यान मृत्यू, अज्ञात ट्रक चालकाविरोधात लोणी काळभोर पोलिसांत गुन्हा दाखल..

लोणी काळभोर, (पुणे) : रक्षाबंधनाचा कार्यक्रम आटोपून रात्रीच्या वेळी घरी परतत असताना पुणे-सोलापूर महामार्गावरील थेऊर फाटा येथे रस्ता ओलांडणाऱ्या तरुणाला भरधाव ट्रकने चिरडल्याची धक्कादायक घटना घडली आहे. या अपघातात गंभीर जखमी झालेल्या 33 वर्षीय तरुणाचा ससून रुग्णालयात उपचारादरम्यान मृत्यू झाला.

पवन हनुमंत सुरवसे (वय 33, रा. 10 वा मैल, वडकी, ता. हवेली, जि. पुणे) असे अपघातात मृत्यू झालेल्या तरुणाचे नाव असून, ते पुणे शहरात ‘झोमॅटो’मध्ये डिलिव्हरी बॉय म्हणून काम करत होते. अपघात घडल्यानंतर वाहनासह पसार झालेल्या अज्ञात ट्रक चालकाविरोधात लोणी काळभोर पोलीस ठाण्यात गुन्हा दाखल करण्यात आला आहे. याबाबत ज्ञानेश्वर शंकर रणदिवे (वय ३४, रा. कुंजीर गॅरेज, थेऊर फाटा) यांनी लोणी काळभोर पोलीस ठाण्यात फिर्याद दिली.

पोलिसांनी दिलेल्या माहितीनुसार, तक्रारदार ज्ञानेश्वर रणदिवे आणि त्यांचे साडू पवन सुरवसे हे 31 ऑगस्ट रोजी कात्रज येथे नातेवाईकांकडे रक्षाबंधनानिमित्त गेले होते. तेथून 1 सप्टेंबर रोजी मध्यरात्री साडेबारा वाजण्याच्या सुमारास रिक्षाने हडपसर येथे आले. हडपसरवरून वडकीकडे जाण्यासाठी रात्री कोणतेही वाहन न मिळाल्याने, दोघांनी थेऊर फाट्यावरील कुंजीर गॅरेजवर रात्र घालवण्याचे ठरवले.

एका पिकअप वाहनातून ते रात्री अडीच वाजण्याच्या सुमारास थेऊर फाट्यापुढे कुंजीर गॅरेजसमोर उतरले. गॅरेजकडे जाण्यासाठी दोघे पुणे-सोलापूर महामार्ग ओलांडत असताना, सोलापूर बाजूकडून पुणे बाजूकडे अत्यंत भरधाव वेगाने आलेल्या एका अज्ञात ट्रकने रस्ता ओलांडणाऱ्या पवन सुरवसे यांना जोरदार धडक दिली आणि ट्रकचालक वाहनासह घटनास्थळावरून पसार झाला.

 

ट्रकच्या धडकेत पवन यांच्या डोक्याला आणि तोंडाला गंभीर दुखापत झाल्याने ते रक्ताच्या थारोळ्यात बेशुद्ध पडले. साडू ज्ञानेश्वर रणदिवे यांनी तत्काळ रुग्णवाहिकेतून त्यांना उरुळी कांचन येथील सिद्धिविनायक हॉस्पिटलमध्ये दाखल केले. तेथे प्राथमिक उपचार केल्यानंतर 1 सप्टेंबर रोजी त्यांना पुढील उपचारासाठी ससून रुग्णालय, पुणे येथे हलवण्यात आले. ससून रुग्णालयात चार दिवसांपासून त्यांच्यावर उपचार सुरू होते, मात्र उपचारादरम्यान शुक्रवारी (ता. 04) त्यांची प्राणज्योत मालवली.

दरम्यान, वाहतुकीच्या नियमांकडे दुर्लक्ष करून भरधाव वेगात वाहन चालवून मृत्यूस कारणीभूत ठरल्याप्रकरणी अज्ञात ट्रक चालकाविरुद्ध गुन्हा दाखल करण्यात आला आहे. तपास पोलीस उपनिरीक्षक शेळके करीत आहेत.