पुणे : जुन्या सांगवी परिसरात दहीहंडीचा उत्सव संपल्यानंतर लोखंडी स्ट्रक्चर उतरवताना झालेल्या अपघातात 45 वर्षीय महिलेचा मृत्यू झाला. सलमा सलाउद्दीन पठाण असे मृत महिलेचे नाव आहे. या घटनेमुळे परिसरात हळहळ व्यक्त होत असून पठाण कुटुंबावर दुःखाचा डोंगर कोसळला आहे.
दहीहंडीचा कार्यक्रम पूर्ण झाल्यानंतर रात्री सुमारे 11 वाजण्याच्या सुमारास मंडळाचे कार्यकर्ते लोखंडी सांगाडा काढण्याचे काम करत होते. त्याच वेळी स्ट्रक्चरचा एक जड भाग अचानक खाली पडला. यावेळी त्याखाली उभ्या असलेल्या सलमा यांच्या डोक्यावर हा अवजड भाग आदळला. या दुर्घटनेत त्यांना गंभीर दुखापत झाली आणि त्यांचा जागीच मृत्यू झाला.
या घटनेनंतर परिसरात एकच खळबळ उडाली. अपघाताची माहिती मिळताच संबंधित यंत्रणांनी घटनास्थळी धाव घेतली. दहीहंडीचा उत्सव आनंदात पार पडल्यानंतर अवघ्या काही वेळातच ही दुर्घटना घडल्याने नागरिकांकडून हळहळ व्यक्त केली जात आहे.
या प्रकरणातील आणखी एक बाब समोर आली आहे. सलमा पठाण यांचा मुलगा याच दहीहंडी मंडळाचा सक्रिय कार्यकर्ता आहे. त्यामुळे या घटनेचे दुःख पठाण कुटुंबासाठी अधिकच तीव्र झाले आहे. मुलगा मंडळात कार्यरत असल्याने कुटुंबीयांनी सध्या पोलिसांकडे तक्रार देण्यास नकार दिल्याची माहिती आहे.
मात्र, घटना गंभीर असल्याने पोलिसांनी याची दखल घेतली आहे. कुटुंबीयांनी तक्रार नोंदवली नसली तरी पोलिसांनी स्वतःहून या घटनेची नोंद करून पुढील कायदेशीर प्रक्रिया सुरू करावी, अशी विनंती कुटुंबीयांना केली आहे.
