Nagpur News: नागपूर : नागपूर शहरात एका पोलीस कर्मचाऱ्याने आत्महत्या (Suicide) केल्याची घटना समोर आल्याने खळबळ उडाली आहे. कौटुंबिक वादातून त्रस्त झालेल्या संबंधित कर्मचाऱ्याने अंबाझरी तलावात उडी मारून आपले जीवन संपवल्याची माहिती पोलिसांनी दिली. 24 फेब्रुवारी रोजी ही घटना घडल्याचा अंदाज असून सकाळी तलावात मृतदेह (Deathbody) आढळून आला.
मिळालेल्या माहितीनुसार, शिलरत्न बेलेकर असे मृत कर्मचाऱ्याचे नाव असून ते वाघदरी-इसासनी परिसरात राहत होते. सकाळच्या वेळी काही तरुण अंबाझरी तलाव परिसरात गेले असता पाण्यात एक मृतदेह तरंगताना दिसला. त्यांनी तात्काळ अंबाझरी पोलिसांना माहिती दिली. पोलिसांनी घटनास्थळी पोहोचून मृतदेह बाहेर काढला. जवळ सापडलेल्या ओळखपत्रावरून मृताची ओळख पटवण्यात आली.
माहितीनुसार, गेल्या 2 वर्षांपासून त्यांचे पत्नीशी मतभेद सुरू होते. कौटुंबिक वादामुळे पत्नी माहेरी राहत होती, तर बेलेकर दोन मुलांसह इसासनी येथील घरी राहत होते. काही दिवसांपासून मुलांच्या ताब्यावरून तणाव वाढला होता. 19 फेब्रुवारीपासून ते ड्युटीवर गैरहजर होते. घरी न परतल्याने त्यांच्या भावाने 22 फेब्रुवारी रोजी प्रतापनगर पोलीस ठाण्यात बेपत्ता असल्याची तक्रार नोंदवली होती.
मृतदेह आढळल्यानंतर पोलिसांनी पंचनामा करून तो पोस्टमॉर्टमसाठी शासकीय मेडिकल रुग्णालयात पाठवला. प्राथमिक तपासात आत्महत्येचा अंदाज व्यक्त केला जात आहे. काही महिन्यांपूर्वी त्यांची बदली हिंगणा पोलीस ठाण्यातून प्रतापनगर पोलीस ठाण्यात झाली होती. या घटनेमुळे पोलीस दलात हळहळ व्यक्त होत असून पुढील तपास सुरू आहे.
