लडकी का चक्कर बाबूभैय्या! गर्लफ्रेंडचा खर्च भागवण्यासाठी बॉयफ्रेंडचा कारनामा; कृत्याने पोलिसांनाही धक्का…

नागपूर: शिक्षण घेत असतानाच (Nagpur Crime)  हॉटेल मॅनेजमेंटचा एक विद्यार्थी (Nagpur News) दुचाकी चोरीच्या मार्गावर गेला आणि अवघ्या काही महिन्यांत तब्बल 11 दुचाकींची चोरी करून पोलिसांच्या रडारवर आला. जुगार खेळण्याचं व्यसन आणि गर्लफ्रेंडच्या खर्चासाठी चोरी करणाऱ्या या तरुणाला अखेर कळमना पोलिसांनी जेरबंद केलं आहे.

अटकेत असलेल्या तरुणाचं नाव देवेश देवेंद्र सनोडिया (वय 20, रा. सुंदरनगर, पारडी) असं आहे. मार्च 2025 पासून ऑक्टोबरपर्यंत कळमना परिसरातील कडकनाथ मार्केटमध्ये दुचाकी चोरीच्या घटना वाढल्या होत्या. व्यापारी, कामगार आणि ग्राहकांची वाहने बाजारातून वारंवार गायब होऊ लागल्याने नागरिक त्रस्त झाले होते.

या वाढत्या चोरीच्या घटनांवर अंकुश आणण्यासाठी पोलिसांनी त्या ठिकाणाचा सखोल अभ्यास करून नकाशा तयार केला. पोलिसांनी स्वतःच्या खर्चाने सीसीटीव्ही कॅमेरे बसवले आणि त्याच फुटेजमधून आरोपीपर्यंत पोहोचण्यात यश मिळाले. 5 ऑक्टोबर रोजी देवेशला अटक करण्यात आली. त्याच्याकडे एक चोरीची दुचाकी सापडली. चौकशीत त्याने आणखी 10 गाड्या चोरी केल्याची कबुली दिली.

 

पोलिसांनी आरोपीकडून एकूण 11 दुचाकी आणि एक आयफोन असा जवळपास 3 लाख 25 हजार रुपयांचा मुद्देमाल जप्त केला आहे. तपासात समोर आलं की, देवेशच्या वडिलांचे कळमना मार्केटमध्ये भाजीपाला विक्रीचे दुकान आहे. त्यामुळे तो नियमित त्या परिसरात वावरत असे. लोक खरेदीत गुंग असताना तो गाड्यांच्या चाव्यांचा वापर करून दुचाकी चोरत असे.

चोरी केलेल्या गाड्या तो खोट्या कागदपत्रांच्या आधारे OLXसारख्या ऑनलाइन प्लॅटफॉर्मवर विकत असे. त्यामुळे अनेक निष्पाप लोकांनी त्याच्याकडून या गाड्या विकत घेतल्याचे पोलिस तपासात स्पष्ट झाले आहे. देवेश हॉटेल मॅनेजमेंटचं शिक्षण घेत असला तरी त्याला जुगाराचे व्यसन होते. त्यातून झालेला तोटा आणि गर्लफ्रेंडच्या खर्चासाठी त्याने चोरीचा मार्ग अवलंबला.

पोलिसांच्या चौकशीत समोर आलं की तो दर गुरुवार आणि शनिवारी सकाळी, जेव्हा मार्केटमध्ये सर्वाधिक गर्दी असते, त्यावेळी होंडा पॅशन आणि होंडा स्प्लेंडर या लोकप्रिय मॉडेलच्या गाड्यांवर डोळा ठेवत असे. पोलिसांनी गेल्या पाच महिन्यांपासून त्याच्यावर गुप्त पाळत ठेवली होती. शेवटी त्याच्या हालचालींचा बारकाईने अभ्यास करून सापळा रचण्यात आला आणि त्याला जेरबंद करण्यात आले. या प्रकरणी पोलिस पुढील तपास करत असून देवेशकडून आणखी काही गुन्ह्यांचा तपशील समोर येण्याची शक्यता आहे.