नागपूर : राज्यात लवकरच 23 हजार 628 पोलीस शिपयांची पदभरती होणार असल्याची माहिती गृहमंत्री देवेंद्र फडणवीस यांनी विधानपरिषदेत दिली. गृह विभागातील पोलीस शिपाई भरती तातडीने करण्याबाबत लक्षवेधी सूचना आमदार सतेज पाटील यांनी मांडली होती. यावर उत्तर देताना गृहमंत्री देवेंद्र फडणवीस बोलत होते. यावेळी त्यांनी राज्यात 23 हजारांपेक्षा जास्त पोलिसांची लवकरच भरती होणार असल्याचे सांगितले.
गृह विभागामध्ये 1976 पासून आकृतीबंध नुसार पदभरती केली जात होती. आता लोकसंख्यनुसार किती अंतरावर पोलिस स्टेशन, कर्मचारी, युनिट असले पाहिजे यानुसार नवीन आकृतीबंध तयार करण्यात आले आहेत. त्याअंतर्गत 23 हजार 628 पोलिस शिपाई पदे भरली जाणार असल्याचे गृहमंत्री देवेंद्र फडणवीस यांनी विधान परिषदेत सांगितले.
नवीन आकृतीबंधानुसार मोठ्या प्रमाणात राज्यात पोलीस भरती करण्यात येणार आहे. यासाठी निधी देखील उपलब्ध करून देण्यात आला आहे. 8 हजार 400 लोकांना प्रशिक्षण देण्याची क्षमता होती, ती आता वाढवण्यात आली आहे. कोरोना महामारीच्या काळात अनेक उमेदवारांची वयोमर्यादा संपत आल्याने उमेदवार निराश झाले होते. यासंदर्भात गृह विभागाशी चर्चा करून लवकरच निर्णय घेऊ, असे गृहमंत्री फडणवीस यांनी सांगितले.
