Buldhana News : बुलढाण्यात थर्टी फर्स्टच्या रात्री अपघात आहे झाल्याने मोठी दुर्घटना घडली आहे. मद्यधुंद कारचालकाने दारुच्या नशेत भरधाव वेगात कार चालवत दुचाकीसह ३ ते ४ वाहनांना जोरदार धडक दिली आहे. या भीषण अपघातात ४ जण गंभीर जखमी झाले आहेत. जखमींपैकी काहींची प्रकृती चिंताजनक असल्याचं सांगितलं जात आहे. त्यांना उपचारासाठी शेगाव येथील रुग्णालयात दाखल करण्यात आलं आहे. थरकाप उडवणारी ही घटना शेगाव -बाळापूर मार्गावर रविवारी रात्री आठ वाजण्याच्या सुमारास घडली आहे.
मिळालेल्या अधिक माहितीनुसार, शेगाव -बाळापूर मार्गावर अपघातग्रस्त कारमधून ४ तरुण प्रवास करत होते. कारचालक हा दारुच्या नशेत गाडी चालवत होता. चालकाचे कारवरील नियंत्रण सुटल्याने समोरुन जात असलेल्या दुचाकीसह ३ ते ४ वाहनांना भरधाव कार धडकली. भरधाव वेगात कारने वाहनांना धडक दिल्यानंतर कार डिव्हाडरवर चढून रस्त्याच्या कडेला जाऊन उलटली.
सुदैवाने या अपघातात कुठलीही जीवितहानी झाली नाही. मात्र, अपघातात चार जण जखमी झाले आहेत. अपघाताची माहिती मिळताच स्थानिकांसह पोलिसांनी घटनास्थळी धाव घेतली. जखमींना तातडीने उपचारासाठी शेगाव येथील रुग्णालयात दाखल करण्यात आलं असून रात्री उशीरापर्यंत पोलिसांकडून गुन्हा दाखल करण्याचे काम सुरू होते.
