नागपूर : अहमदनगर जिल्ह्यातील शनि शिंगणापूर येथील शनैश्वर देवस्थान विश्वस्त मंडळाकडून करण्यात आलेली नोकर भरती, देणगी स्वीकारण्याची पद्धत, इत्यादीबाबत सचिव दर्जाच्या अधिकाऱ्यांकडून उच्चस्तरीय चौकशी करून योग्य ती कार्यवाही करण्यात येईल, अशी ग्वाही उपमुख्यमंत्री तथा गृहमंत्री देवेंद्र फडणवीस यांनी मंगळवारी विधानपरिषदेत दिली.
फडणवीस म्हणाले, शनैश्वर देवस्थानच्या संदर्भातील सदस्यांनी मांडलेले विषय गंभीर आहेत. आवश्यक नसताना १ हजार ८०० जणांची नियुक्ती करण्यात आल्याचे दिसून येत आहे. देवस्थानमध्ये कर्मचारी भरतीच्या अनुषंगाने जाहिरात प्रसिद्ध केली नाही. तसेच देणगी गोळा करण्यासंदर्भातही तक्रारी असून या यासंदर्भात सहाय्यक धर्मादाय आयुक्तांनी चौकशी केली आहे. मात्र, ही चौकशी पुरेशा प्रमाणात करण्यात आली नाही. या चौकशीत विसंगती आहे. त्यामुळे शनैश्वर देवस्थानचे विशेष लेखापरीक्षणनंतर उच्चस्तरीय चौकशी करण्यात येईल. असं फडणवीस म्हणाले.
श्री शनेश्वर संस्थान शनिशिंगणापूर मध्ये होणाऱ्या भ्रष्टाचाराचे दाखले देत या प्रकरणाची तपास यंत्रणांद्वारे सखोल चौकशी करण्याची, देवस्थानच्या मागील दहा वर्षांच्या सर्व आर्थिक व्यवहारांचे ऑडिट करण्याची व श्री शनेश्वर देवस्थान विश्वस्त अधिनियम 2018 ची अंमलबजावणी करण्याची मागणी त्यांनी उपमुख्यमंत्र्यांकडे केली आहे.
शिर्डी देवस्थानच्या धर्तीवर शनिशिंगणापूर देवस्थानसंदर्भातही २०१८ मध्ये कायदा करण्यात आला. मात्र, त्याची अद्याप अंमलबजावणी करण्यात आली नाही. या कायद्याची अंमलबजावणी करण्यासंदर्भात मुख्यमंत्र्यांशी चर्चा करून लवकरात लवकर तो लागू करण्यात येईल, असही उपमुख्यमंत्री फडणवीस यांनी यावेळी सांगितलं.
