पुणे: पुणे जिल्ह्यातील खेड तालुक्यात अल्पवयीन मुलीचा जबरदस्तीने बालविवाह लावून देण्यासाठी बनावट आधारकार्ड तयार केल्याचा धक्कादायक प्रकार उघडकीस आला आहे. विशेष म्हणजे, स्वतः अल्पवयीन मुलीनेच धाडस दाखवत पोलिसांकडे तक्रार केल्यामुळे हा संपूर्ण कट उधळला गेला. या प्रकरणी उत्तर म्हाळुंगे पोलिसांनी एका व्यक्तीविरुद्ध गुन्हा दाखल करून पुढील तपास सुरू केला आहे.
पोलिसांनी दिलेल्या माहितीनुसार, खेड तालुक्यातील आंबेठाण येथे १५ जून ते २० जुलै २०२६ या कालावधीत हा प्रकार घडला. तक्रारदार मुलीची जन्मतारीख २८ जानेवारी २००९ असून ती अद्याप अल्पवयीन आहे. मात्र, तिचे वय १८ वर्षे पूर्ण झाल्याचे दाखवून बालविवाह लावून देण्याचा प्रयत्न करण्यात आल्याचा आरोप आहे.
तपासानुसार, संशयित आरोपी पंडित माणिक किंगरे (वय ४२, रा. आंबेठाण, ता. खेड, जि. पुणे) याने मुलीची खरी जन्मतारीख बदलून २८ जानेवारी २००८ अशी दर्शवणारे कथित बनावट आधारकार्ड तयार केले. या कागदपत्राच्या आधारे मुलगी सज्ञान असल्याचे भासवून तिचे लग्न लावून देण्याचा प्रयत्न करण्यात आल्याचे पोलिसांच्या प्राथमिक तपासात समोर आले आहे.
दरम्यान, आपल्या जन्मतारखेत बदल करण्यात आल्याचे आणि बनावट कागदपत्रांच्या आधारे स्वतःच्या भविष्याशी खेळ केला जात असल्याचे मुलीच्या लक्षात आले. त्यानंतर तिने कोणत्याही दबावाला बळी न पडता थेट उत्तर म्हाळुंगे पोलीस ठाणे गाठले आणि संपूर्ण प्रकाराची माहिती देत अधिकृत तक्रार दाखल केली. तिच्या तक्रारीमुळे कथित बालविवाहाचा हा प्रयत्न वेळेत उघडकीस आला.
या प्रकरणी उत्तर म्हाळुंगे पोलिसांनी आरोपीविरुद्ध बनावट शासकीय कागदपत्र तयार करणे आणि अल्पवयीन मुलीचा विवाह लावून देण्याच्या प्रयत्नाशी संबंधित विविध कलमांखाली गुन्हा दाखल केला आहे. या कृत्यात आरोपीला आणखी कोणाची मदत मिळाली होती का, बनावट कागदपत्र तयार करण्यामागे इतरांचा सहभाग होता का, याचाही तपास पोलिसांकडून सुरू आहे. तसेच या प्रकरणातील सर्व संबंधित बाबींची सखोल चौकशी करण्यात येत असल्याची माहिती पोलिसांनी दिली आहे.
