पुणे : अंधश्रद्धा निर्मूलन समितीचे कार्याध्यक्ष डॉ. नरेंद्र दाभोलकर यांच्या हत्येप्रकरणी मंगळवारी (ता. १९) बचाव पक्षाकडून दोन साक्षीदारांची नावे सादर करण्यात आली. न्यायालयाने दोन साक्षीदारांना हजर राहण्यासाठी समन्स बजाविले आहेत.
डॉ. दाभोलकर हत्येप्रकरणी डॉ. वीरेंद्रसिंह तावडे, ॲड. संजीव पुनाळेकर, विक्रम भावे, सचिन अंदुरे, शरद कळसकर यांच्याविरुद्ध आरोप निश्चित करण्यात आले आहेत. दरम्यान, याप्रकरणी केंद्रीय गुन्हे अन्वेषण विभागाकडून (सीबीआय) पुरावे सादर केले होते. मात्र, सीबीआयने सादर केलेले पुरावे खोटे असल्याचे दावा आरोपींनी यापूर्वी झालेल्या सुनावणीत न्यायालयात केला होता. तर शरद कळसकर, संजीव पुनाळेकर यांनी लेखी म्हणणे सादर केले होते. तर, डॉ. तावडे यांनी सीबीआयच्या अधिकाऱ्यांना साक्ष देण्यासाठी बोलविण्याची मागणी केली होती.
दरम्यान, न्यायालयाने पुढील सुनावणीच्या वेळी साक्षीदारांची यादी सादर करण्याचा आदेश बचाव पक्षाला दिला होता. सीबीआयने आतापर्यंत २० साक्षीदार सादर केले असून, त्यांची साक्ष आणि उलटतपासणी पूर्ण झाली आहे. गेल्या सुनावणी दरम्यान न्यायालयाने आरोपींना ३०० पेक्षा जास्त प्रश्न विचारले होते. त्यावेळी आरोपींनी अनेक प्रश्नांना ‘माहीत नाही’, असे उत्तर दिले होते. मंगळवारी झालेल्या सुनावणीत बचाव पक्षाने दोन साक्षीदारांची नावे न्यायालयात सादर केली. या प्रकरणात पुढील सुनावणी ५ जानेवारी रोजी होणार आहे.
