Crime News : अमरावती: अमरावती जिल्ह्यातील भानखेडा शिवारात एका 18 वर्षीय तरुणीवर सामूहिक अत्याचार झाल्याची अत्यंत संतापजनक घटना समोर आली आहे. या घटनेमुळे संपूर्ण जिल्ह्यात खळबळ उडाली असून महिलांच्या सुरक्षेचा प्रश्न पुन्हा एकदा ऐरणीवर आला आहे. शनिवारी पीडित तरुणी तिच्या एका मित्रासोबत दुचाकीवरून जात असताना पाच जणांच्या टोळीने त्यांना अडवून ही अमानुष कृती केल्याचे उघड झाले आहे.
मिळालेल्या माहितीनुसार, पीडिता आणि तिचा मित्र भानखेडा जंगल परिसरातील रस्त्यावरून जात होते. यावेळी दबा धरून बसलेल्या पाच नराधमांनी त्यांची गाडी अडवली आणि दोघांनाही लाथाबुक्क्यांनी बेदम मारहाण करण्यास सुरुवात केली. क्रूरतेचा कळस म्हणजे, या नराधमांनी आधी पीडितेच्या मित्राच्या खिशातील 150 रुपये जबरदस्तीने काढून घेतले आणि त्यानंतर तरुणीवर बळजबरीने अत्याचार केला. या अत्याचारानंतर आरोपींनी तेथून पळ काढला. या हल्ल्यात पीडित तरुणीची प्रकृती खालावल्याने तिला तातडीने जिल्हा सामान्य रुग्णालयात उपचारासाठी दाखल करण्यात आले आहे. सध्या तिची प्रकृती चिंताजनक असल्याचे समजते.
घटनेची माहिती मिळताच फ्रेजरपुरा पोलिसांनी युद्धपातळीवर तपासाची चक्रे फिरवली. पोलिसांनी तत्काळ गुन्हा दाखल करून आरोपींच्या शोधासाठी पथके रवाना केली होती. अवघ्या काही तासांतच पोलिसांनी पाचही संशयित आरोपींना ताब्यात घेतले असून त्यांची कसून चौकशी सुरू आहे. या घटनेमुळे अमरावतीमध्ये संतप्त प्रतिक्रिया उमटत असून आरोपींना कडक शासन करण्याची मागणी होत आहे.
