अमरावती : शेतकऱ्यांना कर्जमाफी मिळावी यासाठी प्रहार जनशक्ती पक्षाचे प्रमुख आणि माजी राज्यमंत्री बच्चू कडू यांचं गेल्या सात दिवसांपासून राष्ट्रसंत तुकडोजी महाराज समाधीस्थळी अन्नत्याग आंदोलन सुरू आहे. याचदरम्यान, महसूलमंत्री चंद्रशेखर बावनकुळे यांनी बच्चू कडू यांची आंदोलनस्थळी जाऊन भेट घेत त्यांच्याशी चर्चा केली व मुख्यमंत्री देवेंद्र फडणवीस यांच्याशी थेट फोनवरून संपर्क साधून परिस्थितीची माहिती दिली.

यावेळी बावनकुळे यांनी शेतकरी कर्जमाफीवर सरकार सकारात्मक असल्याचे सांगितले. पण कर्जमाफीसाठी काही अटी असतील ज्यासाठी एक समिती स्थापन केली जाईल. अशी माहिती देखील त्यांनी यावेळी दिली.
बावनकुळे म्हणाले, “राज्यात याआधीही अनेक कर्जमाफी योजना राबवल्या गेल्या आहेत. मात्र, त्यातील अनेक अंमलबजावणीत त्रुटी राहिल्या. यावर उपाय म्हणून यंदा शेतकऱ्यांची आर्थिक आणि सामाजिक परिस्थिती लक्षात घेऊन ‘वर्गवारी’ करण्यात येणार आहे. आयकर भरणाऱ्या मोठ्या शेतकऱ्यांऐवजी खरोखरच गरजू आणि मागास शेतकऱ्यांनाच लाभ मिळावा यासाठी एक उच्चस्तरीय समिती स्थापन केली जाणार आहे.” असं बावनकुळे यांनी सांगितलं.

बावनकुळे पुढे म्हणाले, “सर्वसामान्य शेतकऱ्यांना न्याय मिळावा, यासाठी निर्णय अहवालाआधारेच घेतले जातील. फसवणूक होऊ नये म्हणूनच सरकारची भूमिका वेगळी आहे.”
दरम्यान, कर्जमाफीशिवाय बच्चू कडू यांनी एकूण 17 मागण्यांसाठी आंदोलन सुरू केले आहे. यामध्ये दिव्यांगांना देण्यात येणाऱ्या मानधनात वाढ करून ते 6,000 करण्याची मागणी महत्त्वाची आहे. यावर देखील सरकारने सकारात्मक भूमिका दर्शवली असून, देशातील इतर राज्यांतील मानधनाचा अभ्यास करून लवकरच निर्णय घेतला जाईल, असेही बावनकुळे यांनी स्पष्ट केलं आहे.







