अमरावती : अमरावती शहरात आईची गळा दाबून हत्या केल्याची धक्कादायक घटना समोर आली आहे. आई सतत खोटे बोलत असल्याच्या रागातून मुलाने हे कृत्य केल्याची प्राथमिक माहिती आहे. विशेष म्हणजे, हत्या केल्यानंतर आरोपी मुलगा आईच्या मृतदेहाशेजारी खुर्चीवर बसून राहिला होता. शेजाऱ्यांना घटनेची माहिती मिळाल्यानंतर त्यांनी पोलिसांना बोलावले. पोलिसांनी घटनास्थळी पोहोचून आरोपीला ताब्यात घेतले असून, गाडगेनगर पोलिसांनी त्याला अटक केली आहे.
ही घटना अमरावती शहरातील नवसारी रिंग रोड परिसरातील गजानन प्लाझा अपार्टमेंटमध्ये घडली. रंजना सतीश कानफाडे (वय ६५) असे मृत महिलेचे नाव असून, तुषार सतीश कानफाडे असे आरोपी मुलाचे नाव आहे. तुषार हा पुण्यातील एका आयटी कंपनीत इंजिनिअर म्हणून काम करतो. सध्या तो वर्क फ्रॉम होम पद्धतीने काम करत असल्याने घरातूनच आपले काम सांभाळत होता.
मिळालेल्या माहितीनुसार, तुषार आणि त्याची आई रंजना हे दोघेच घरात राहत होते. आई सतत खोटे बोलत असल्याच्या कारणावरून दोघांमध्ये वाद होत असल्याची माहिती समोर आली आहे. याच रागातून तुषारने आईचा गळा दाबून हत्या केल्याचे पोलिसांनी सांगितले.
या घटनेतील सर्वाधिक धक्कादायक बाब म्हणजे, आईचा मृत्यू झाल्यानंतरही तुषार घराबाहेर न जाता तिच्या मृतदेहाशेजारी खुर्चीवर बसून होता. तो मृतदेहाच्या बाजूलाच बराच वेळ बसून असल्याचे समोर आले आहे. शेजाऱ्यांना घटनेची माहिती मिळाल्यानंतर त्यांनी तातडीने पोलिसांना कळवले. त्यानंतर गाडगेनगर पोलिसांनी घटनास्थळी धाव घेत तुषारला ताब्यात घेतले.
या प्रकरणी पोलिसांनी गुन्हा दाखल करून तुषारला अटक केली आहे. आईच्या हत्येमागे केवळ खोटे बोलण्याचा राग होता की अन्य काही कारणेही होती, याचा तपास पोलीस करत आहेत. या घटनेमुळे अमरावती शहरात खळबळ उडाली आहे.
