Sharad Pavar : मुंबई : महाराष्ट्रातील राजकारणाला हादरा देणारी बातमी आहे. राष्ट्रवादीचे नेते अजित पवार यांनी पुन्हा एकदा पक्षात बंड केलं असून, अजित पवार यांनी पुन्हा एकदा भाजपसोबत हातमिळवणी केली आहे. शिवसेनेनंतर आदा राष्ट्रवादीमध्ये मोठी फूट पडली असून, महाविकास आघाडीचं अस्तित्व धोक्यात आल्याचं सांगितलं जात आहे. तर राष्ट्रवादीचे सर्वेसर्वा शरद पवार यांनी आजच्या शपथविधीला आपला पाठिंबा नसल्याचं म्हटलं आहे. मात्र, आता शरद पवार हे पक्षातील बंड कसं रोखतात याकडे सर्वांचं लक्ष लागलं आहे. (Sharad Pavar)
दरम्यान, अजित पवार यांना पक्षातील ४० आमदारांनी पाठिंबा दिला आहे. ५४ पैकी ४० आमदार अजितदादांसोबत आहेत. म्हणजे जवळपास सर्व पक्षच अजित पवार यांच्यासोबत गेल्याचं चित्र आहे. त्यामुळे शरद पवार हे पक्षातच मायनॉरिटीत गेले आहेत. शरद पवार यांच्यासोबत अवघे १५ आमदार असल्याचं सांगितलं जात आहे. शरद पवार हे बंड कसं मोडून काढतात, याकडे सर्वांचं लक्ष लागलं आहे. (Sharad Pavar)
राष्ट्रवादीत फूट पडल्याने महाविकास आघाडीचं अस्तित्व धोक्यात आल्याचं सांगितलं जात आहे. महाविकास आघाडीने एकत्रितपणे लोकसभा आणि विधानसभा निवडणुका लढवण्याचा निर्णय घेतला होता. पण त्याआधीच राष्ट्रवादीत फूट पडल्याने पक्ष कमकुवत झाला आहे. या फुटीने महाविकास आघाडीवर मोठा परिणाम होणार असल्याचं सांगितलं जात आहे.
राज्यात आज तीन बैठका झाल्या. एक बैठक अजित पवार यांच्या निवासस्थानी झाली. दुसरी बैठक मुख्यमंत्र्यांच्या निवासस्थानी झाली. तर तिसरी बैठक ही देवेंद्र फडणवीस यांच्या निवासस्थानी झाली. मुख्यमंत्री आणि उपमुख्यमंत्र्यांच्या निवासस्थानी झालेली बैठक ही मंत्रिमंडळ विस्ताराची बैठक असल्याचं सांगितलं जात होतं. राष्ट्रवादीत मोठी फूट पडणार असल्याची कुणाला कुणकुणही नव्हती. मात्र, दुपारनंतर अचानक घडामोडी घडल्या आणि राष्ट्रवादीत मोठी फूट पडली.
दरम्यान, राष्ट्रवादीचे सर्वेसर्वा शरद पवार यांनी आजच्या शपथविधीला आमचा पाठिंबा नाही, असं स्पष्ट केलं आहे. काही दिवसांपूर्वी अजित पवार हे दिल्लीत होते. त्याचवेळी मुख्यमंत्री एकनाथ शिंदे आणि देवेंद्र फडणवीसही दिल्लीत होते. त्याचवेळी या तिघांमध्ये सरकार स्थापण्याचं ठरल्याचं सूत्रांनी सांगितलं.
