नंदुरबार : नंदुरबार शहरात बालक आणि युवकांना पैशांचे आमिष दाखवून जवळीक साधणे, त्यानंतर लैंगिक अत्याचार करून अश्लील व्हिडिओच्या माध्यमातून ब्लॅकमेल केल्याचा गंभीर प्रकार समोर आला आहे. या प्रकरणी पोलिसांनी चेतन कोळी या संशयिताला ताब्यात घेतले असून त्याच्याकडील मोबाईल, लॅपटॉप आणि इतर साहित्य जप्त केले आहे.
पोलिसांच्या प्राथमिक तपासानुसार, हा प्रकार 2022 ते 6 ऑगस्ट 2026 या कालावधीत सुरू असल्याचा संशय आहे. संशयिताकडून बालक आणि युवकांना वेगवेगळ्या कारणांनी जवळ केले जात असल्याची माहिती पोलिसांना मिळाली होती. त्यानंतर पोलिसांनी विशेष पथक तयार करून त्याच्यावर लक्ष ठेवण्यास सुरुवात केली.
मिळालेल्या माहितीनुसार, रायसिंगपुरा परिसरात राहणारा संशयित काही मुलांना पैशांचे आमिष दाखवत असल्याचा आरोप आहे. त्यानंतर त्यांच्यावर अत्याचार करून संबंधित प्रकारांचे व्हिडिओ तयार केले जात असल्याचे तपासात समोर आले आहे. या व्हिडिओंचा वापर करून पीडितांना धमकावले आणि ब्लॅकमेल केले जात असल्याचा संशय पोलिसांनी व्यक्त केला आहे.
6 ऑगस्ट रोजी एका अल्पवयीन मुलाला भेटण्यासाठी संशयिताने शहरातील एका पपईच्या शेतात बोलावल्याची माहिती पोलिसांना मिळाली. पोलिसांचे पथक आधीपासूनच साध्या वेशात त्या परिसरात तैनात होते. संशयित तेथे पोहोचताच पोलिसांनी त्याला ताब्यात घेतले.
मोबाईलच्या तपासणीत अनेक अश्लील व्हिडिओ आणि छायाचित्रे आढळल्याचे पोलिसांनी सांगितले. या डिजिटल पुराव्यांच्या आधारे संबंधित पीडितांची ओळख पटवण्याचे काम सुरू आहे. जप्त केलेल्या उपकरणांच्या तपासातून आणखी धक्कादायक माहिती समोर येण्याची शक्यता आहे.
या प्रकरणात आणखी किती बालक आणि युवक पीडित आहेत, याचा तपास पोलिसांकडून सुरू आहे. जिल्हा पोलीस अधीक्षक अश्विनी सानप यांनी प्रकरणाचा सखोल तपास करण्यात येत असल्याचे सांगितले आहे. प्रकरण उघडकीस आल्यानंतर परिसरात खळबळ उडाली असून, पालकांनी मुलांशी नियमित संवाद ठेवावा आणि त्यांच्या हालचालींकडे लक्ष द्यावे, असे आवाहन करण्यात येत आहे.
