पुणे: पुणे शहरात शुक्रवारी PMPML बसच्या धडकेत वेगवेगळ्या ठिकाणी 2 महिलांचा मृत्यू झाल्याने खळबळ उडाली आहे. या दोन्ही घटनांमुळे शहरातील रस्त्यांवर PMPML बसच्या सुरक्षित वाहतुकीचा प्रश्न पुन्हा चर्चेत आला आहे.
पहिला अपघात चांदणीनगर परिसरात पुणे-नगर महामार्गावर झाला. सुनीता काटे (वय 54, रा. आकुर्डी) या आपल्या मुलासोबत स्कूटरवरून पुण्याहून वाघोलीच्या दिशेने जात होत्या. त्यावेळी PMPML बसने त्यांच्या स्कूटरला जोरदार धडक दिली. अपघातात सुनीता काटे गंभीर जखमी झाल्या. त्यांना रुग्णालयात नेण्यापूर्वीच त्यांचा मृत्यू झाला. या घटनेत त्यांचा मुलगाही जखमी झाला असून त्याच्यावर उपचार सुरू आहेत.
या अपघातानंतर संबंधित बसचालक बस घेऊन घटनास्थळावरून पळून गेल्याचे पोलिसांनी सांगितले. त्यामुळे हा हिट अँड रनचा प्रकार असल्याचा संशय आहे. पोलिसांकडून परिसरातील सीसीटीव्ही फुटेज तपासले जात असून बसचा क्रमांक आणि चालकाची ओळख पटवण्याचे प्रयत्न सुरू आहेत.
दुसरी घटना शुक्रवारी दुपारी बोपोडी-खडकी मार्गावर घडली. निर्मला नरेश पिल्लई (वय 57, रा. बोपोडी) या पायी खडकीच्या दिशेने जात असताना PMPML बसने त्यांना धडक दिली. या अपघातात त्यांचा मृत्यू झाला.
या प्रकरणी खडकी पोलिसांनी 22 वर्षीय बसचालकाला ताब्यात घेतले होते. त्यानंतर त्याला नोटीस देऊन सोडण्यात आले. पिल्लई यांची मुलगी प्रीती मूर्ती यांनी पोलिसांत तक्रार दाखल केली आहे.
