Suicide News: जळगाव : जळगाव शहरातून एक हृदयद्रावक आणि धक्कादायक घटना समोर आली आहे. कॉलेजच्या प्राचार्यांनी मित्रांसमोर मारहाण केल्याने आलेल्या मानसिक तणावातून एका विद्यार्थ्याने गळफास घेऊन आत्महत्या (Suicide) केल्याची घटना घडली आहे. या घटनेमुळे परिसरात खळबळ उडाली असून विद्यार्थ्यांच्या मानसिक सुरक्षिततेबाबत पुन्हा एकदा प्रश्न उपस्थित झाला आहे.
आत्महत्या केलेल्या विद्यार्थ्याचे नाव श्याम प्रभाकर पाटील असून तो वीस वर्षांचा होता. तो गुलाबराव देवकर कॉलेज ऑफ फार्मसी येथे शिक्षण घेत होता. काही दिवसांपूर्वी कॉलेजमध्ये झालेल्या एका वादानंतर प्राचार्य योगेश पवार यांनी श्यामला मित्रांसमोर पीव्हीसी पाईपने मारहाण केल्याचा आरोप करण्यात आला आहे. या घटनेनंतर श्याम प्रचंड नैराश्यात होता.
चिठ्ठी लिहलं होतं आत्महत्येचे कारण
मिळालेल्या माहितीनुसार, श्यामने आत्महत्येपूर्वी एक चिठ्ठी लिहिली होती. या चिठ्ठीत त्याने आपण निर्दोष असल्याचे नमूद केले असून मित्रांच्या भांडणात पडल्यामुळे सर्व प्रकार घडल्याचे सांगितले आहे. मी प्राचार्यांकडे तक्रार करण्यासाठी गेलो होतो, मात्र तिथेच आपल्याला मारहाण झाली, असे त्याने लिहिले आहे. संपूर्ण शिक्षकवर्गासमोर माझी बेइज्जती करण्यात आल्याने आपण खूप दुखावल्याचेही त्याने चिठ्ठीत नमूद केले आहे.
तसेच, मी गेल्यानंतर कॉलेजचे सीसीटीव्ही फुटेज तपासावे, अशी मागणीही श्यामने चिठ्ठीत केली आहे. आई-वडील, मित्र रामू आणि सिद्ध यांची माफी मागितली. आपली कथा इंस्टाग्राम वर शेअर करण्याची विनंतीही त्याने मित्राला केली आहे.
या घटनेची माहिती मिळताच पोलिसांनी घटनास्थळी धाव घेतली असून मृतदेह ताब्यात घेऊन शवविच्छेदनासाठी पाठवण्यात आला आहे. पोलिसांनी चिठ्ठी जप्त केली असून संपूर्ण प्रकरणाचा तपास सुरू आहे. या घटनेमुळे विद्यार्थ्यांच्या मानसिक आरोग्याची काळजी घेणे किती महत्त्वाचे आहे, हे पुन्हा एकदा अधोरेखित झाले आहे.
