जळगाव: जळगाव जिल्ह्यातील फत्तेपूर गावात माणुसकीला काळीमा फासणारी एक अत्यंत संतापजनक घटना समोर आली आहे. शेतीसाठी घेतलेल्या ट्रॅक्टरचे भाडे थकीत असल्याच्या कारणावरून, एका ३० वर्षीय विवाहित महिलेवर चार नराधमांनी सामूहिक अत्याचार केल्याची भयंकर घटना उघडकीस आली आहे. या प्रकरणात पोलिसांनी ट्रॅक्टर मालकासह चारही आरोपींना गुरुवारी अटक केली असून, या घटनेमुळे संपूर्ण परिसरात तीव्र संताप व्यक्त केला जात आहे.
मिळालेल्या माहितीनुसार, या प्रकरणातील पीडितेच्या पतीने काही काळापूर्वी शेतीची कामे करण्यासाठी एका ओळखीच्या व्यक्तीकडून ट्रॅक्टर भाड्याने घेतला होता. या व्यवहारापोटी १ लाख रुपयांचे भाडे देणे बाकी होते. घरची आर्थिक परिस्थिती बेताची असल्याने पतीला ही रक्कम वेळीच देणे शक्य झाले नाही. काही दिवसांपूर्वी महिला शेतात काम करत असताना, ट्रॅक्टर मालक तिथे एकटाच पोहोचला आणि त्याने महिलेला फूस लावून काहीतरी खायला दिले. ते पदार्थ खाल्ल्यानंतर महिलेला चक्कर आली आणि ती बेशुद्ध झाली. संधी साधून संबंधित मालकाने आपल्या ३ साथीदारांना त्वरित शेतात बोलावून घेतले. यानंतर या चारही नराधमांनी मिळून त्या महिलेवर सामूहिक अत्याचार केला.
या अमानवी कृत्यानंतर आरोपींनी महिलेला जीवे मारण्याची धमकी दिली, ज्यामुळे दहशतीखाली असलेली महिला सुरुवातीला कोणालाही काही सांगू शकली नाही. मात्र, पीडितेने या अत्याचाराविरुद्ध आवाज उठवण्याचे धाडस दाखवत अखेर पोलिसांत तक्रार नोंदवली. पीडितेच्या तक्रारीची गंभीर दखल घेत पोलिसांनी या प्रकरणातील चारही आरोपींना पोलिसांनी अवघ्या काही तासांत बेड्या ठोकल्या आहेत. सध्या पोलीस या घटनेचा अधिक सखोल तपास करत आहे.
