अहिल्यानगर: अहिल्यानगर जिल्ह्यातील अकोले तालुक्यातून बालहक्कांचे धिंडवडे काढणारी आणि संपूर्ण महाराष्ट्राला हादरवून टाकणारी एक अतिशय चिंताजनक घटना समोर आली आहे. सरकारी सर्वेक्षणात या एकाच तालुक्यामध्ये तब्बल 55 अल्पवयीन मुली गरोदर असल्याचे उघड झाले असून, यामुळे सर्वत्र मोठी खळबळ उडाली आहे. या धक्कादायक आकडेवारीने प्रशासकीय यंत्रणेचे धाबे दणाणले आहेत. कागदोपत्री आलेल्या आकडेवारीपेक्षा प्रत्यक्षात गरोदर असणाऱ्या अल्पवयीन मुलींची संख्या खूप जास्त असण्याची भीती जाणकारांकडून व्यक्त केली जात आहे.
महिला व बालविकास विभागाच्या वतीने अकोले आणि राजूर प्रकल्पांतर्गत अंगणवाडी सेविकांमार्फत दरमहा गरोदर व स्तनदा मातांचे नियमित सर्वेक्षण केले जाते. यादरम्यान ही भयंकर माहिती प्रकाशात आली. विशेष म्हणजे, केंद्र सरकारच्या ‘मातृत्व वंदना योजने’चा आर्थिक लाभ मिळवण्यासाठी आलेल्या अर्जांची तपासणी करताना या अल्पवयीन मातांची नावे समोर आली आणि अधिकाऱ्यांचे डोळे उघडले. मिळालेल्या माहितीनुसार, या 55 मुलींपैकी 54 मुलींचे बालविवाह झाले आहेत, तर 1 मुलगी अविवाहित असतानाच गरोदर राहिली आहे. यातील काही अल्पवयीन मुलींची तर प्रसूती देखील झाली आहे.
या अत्यंत गंभीर प्रकरणाची दखल घेऊन आता महाराष्ट्र राज्य बालहक्क आयोगाकडे सखोल चौकशीची मागणी करण्यात आली आहे. दरम्यान, बालविवाह पूर्णपणे रोखण्यासाठी कडक कारवाई करण्याची मागणी आता जोर धरू लागली आहे.
