Nashik Crime : नाशिक : नाशिकमध्ये सोमवारी संध्याकाळी एक थरारक आणि धक्कादायक घटना घडली आहे. एका महिलेने आपल्या ओळखीच्या व्यक्तीला भररस्त्यात गाठून त्याच्यावर प्राणघातक हल्ला केला. या घटनेचा व्हिडिओ सोशल मीडियावर व्हायरल झाला असून यामुळे संपूर्ण शहरात खळबळ उडाली आहे.
मिळालेल्या माहितीनुसार, सूरज सोलंकी असे जखमी झालेल्या व्यक्तीचे नाव असून त्याचे वय 37 वर्ष आहे. तो मूळचा गुजरातचा असून सध्या कामानिमित्त नाशिकमध्ये वास्तव्यास आहे. संबंधित महिलेने सूरजला फोन करून बोलावून घेतले होते. फोनवर बोलताना त्यांच्यात वाद झाला आणि सूरज आपल्या दुचाकीवरून घटनास्थळी पोहोचला. तो तिथे येताच महिलेने आधी त्याच्या डोळ्यात मिरची पूड फेकली आणि त्यानंतर दगडाने मारहाण करण्यास सुरुवात केली. एवढ्यावरच न थांबता तिने सोबत आणलेल्या कोयत्याने सूरजवर वार केले. या हल्ल्यात सूरज गंभीर जखमी झाला असून त्याची प्रकृती सध्या चिंताजनक आहे.
ही महिला आपल्या एका साथीदारासोबत दुचाकीवरून आली होती. तिने आपला चेहरा ओढणीने झाकला होता आणि गाडीची ओळख पटू नये म्हणून नंबर प्लेटवरही कापड बांधले होते. एका प्रत्यक्षदर्शीने आपल्या मोबाईलमध्ये या घटनेचा व्हिडिओ रेकॉर्ड केला आणि तातडीने पोलिसांना माहिती दिली. त्याने आरोपींचा पाठलाग करण्याचा प्रयत्न केला, मात्र आरोपी मुंबईच्या दिशेने पळून जाण्यात यशस्वी झाले.
सूरजच्या दुचाकीवर ‘स्त्रियांचा आदर करा पण त्यांच्यावर विश्वास ठेवू नका’ असा मजकूर लिहिलेला आढळून आला आहे. सूरजच्या कुटुंबीयांनी दिलेल्या माहितीनुसार, त्याने फोनवर बोलताना त्या महिलेचा उल्लेख ‘जेनी’ असा केला होता. नाशिक ग्रामीण पोलिसांनी याप्रकरणी गुन्हा दाखल केला असून सीसीटीव्ही फुटेज आणि मोबाईल लोकेशनच्या मदतीने आरोपींचा शोध सुरू केला आहे. या घटनेमुळे नाशिकमधील कायदा आणि सुव्यवस्थेचा प्रश्न पुन्हा एकदा ऐरणीवर आला असून नागरिकांकडून संताप व्यक्त केला जात आहे. लवकरच आरोपीला अटक केली जाईल, असे आश्वासन पोलिसांनी दिले आहे.
