पुणे : पुणे शिक्षक आणि पदवीधर मतदारसंघाच्या निवडणुकीचे निकाल समोर येत असून, यामध्ये नेहमी चर्चेत असणारे अपक्ष उमेदवार अभिजीत बिचुकले यांना मोठा धक्का बसला आहे. पुणे शिक्षक मतदारसंघात बिचुकले यांना केवळ 19 मते मिळाल्याने एलिमिनेशन फेरीतच ते बाद झाले आहेत. या मतदारसंघात एकूण 19 उमेदवार बाद झाले असून, अजून विजयाचा 25,756 मतांचा कोटा पूर्ण न झाल्यामुळे अंतिम निकालासाठी प्रतीक्षा करावी लागत आहे.
शिक्षक मतदारसंघात सध्या कौस्तुभ गावडे 17,600 मते घेऊन आघाडीवर आहेत. त्यांच्या पाठोपाठ सचिन सानप (11,328 मते), दत्तात्रय सावंत (10,377 मते) आणि जयंत आसगावकर (8,350 मते) यांचा क्रमांक लागतो.
दुसरीकडे, पुणे पदवीधर मतदारसंघात कौल कोणाच्या बाजूने लागणार याकडे सर्वांचे लक्ष लागले आहे. पदवीधरसाठी 1,13,113 मतांचा कोटा निश्चित करण्यात आला आहे. पहिल्या फेरीच्या मतमोजणीत हर्षदा जाधव यांनी 1,12,400 मते मिळवून भक्कम आघाडी घेतली आहे. त्यांना विजयासाठी आता अवघ्या 716 मतांची गरज आहे. तर स्मित जाधव यांना 1,02,000 मते मिळाली आहेत. शिक्षक मतदारसंघात पराभव झाला असला तरी पदवीधर मतदारसंघात बिचुकले यांच्या कामगिरीकडे सर्वांचे लक्ष आहे.
निवडणुकीचा अर्ज भरताना अभिजीत बिचुकले यांनी नेहमीच्या शैलीत मोठा दावा केला होता. शिक्षकांचे आणि पदवीधरांचे प्रश्न सोडवण्यासाठी आपल्यासारखा खंबीर नेताच सभागृहात हवा, असे सांगत त्यांनी इतर उमेदवारांना आव्हान दिले होते. “मी निवडणुकीत उभा राहिलो म्हणजे सरकारपेक्षा मोठा आहे,” अशा शब्दांत त्यांनी आपला विश्वास व्यक्त केला होता. मात्र, प्रत्यक्ष मतमोजणीत मतदारांनी त्यांना डावलल्याचे स्पष्ट समोर आले आहे.
