नाशिक: नाशिकमधील स्वयंघोषित ज्योतिषी आणि आध्यात्मिक गुरु म्हणून ओळख निर्माण केलेल्या अशोक खरात प्रकरणात (Ashok Kharat) आता आणखी एक धक्कादायक घडामोड समोर आली आहे. अनेक गंभीर गुन्ह्यांमध्ये (Nashik News) अटकेत असलेला खरात चौकशीदरम्यान पूर्णपणे खचल्याचं चित्र दिसून आलं आहे. (Latest Marathi News)
विशेष तपास पथकासमोर (एसआयटी) चौकशीदरम्यान अशोक खरातने अत्यंत भावनिक प्रतिक्रिया दिली. “मी आता इथून बाहेर पडेन असं वाटत नाही… माझं मरण आता इथंच आहे,” असे शब्द त्याने चौकशीदरम्यान उच्चारल्याची माहिती सूत्रांकडून समोर आली आहे. या वक्तव्यावेळी तो ढसाढसा रडत असल्याचंही सांगितलं जात आहे.
अशोक खरातवर सध्या विविध प्रकारचे 15 गुन्हे दाखल आहेत. त्यापैकी 3 गंभीर प्रकरणांची चौकशी एसआयटीमार्फत सुरू आहे. चौकशीदरम्यान अनेक धक्कादायक माहिती समोर येत असून त्याच्या आर्थिक व्यवहारांवरही तपास यंत्रणांचे लक्ष केंद्रीत झाले आहे. आर्थिक गैरव्यवहार प्रकरणी अंमलबजावणी संचालनालयाकडूनही (ईडी) तपास सुरू आहे.
खरातने ‘दिव्यशक्ती’ असल्याचा दावा करत अनेकांना फसवल्याचा आरोप आहे. महिलांना भीती दाखवून, बदनामीची धमकी देत त्यांचं लैंगिक शोषण केल्याच्या अनेक तक्रारी समोर आल्या आहेत. विशेष म्हणजे, हे प्रकार त्याच्या कार्यालयातच घडल्याचे आणि त्याचे सीसीटीव्ही पुरावेही तपास यंत्रणांच्या हाती लागल्याचे सांगितले जात आहे.
या प्रकरणात अनेक राजकीय, व्यावसायिक आणि उच्चभ्रू व्यक्तींची नावे समोर आल्याने प्रकरण अधिकच गाजत आहे. त्यामुळे तपासाची व्याप्ती वाढली असून राज्यभरात या प्रकरणाकडे लक्ष लागले आहे.
सध्या महिला आयपीएस अधिकारी तेजस्वी सातपुते यांच्या नेतृत्वाखालील विशेष तपास पथक या प्रकरणाचा सखोल तपास करत आहे. मात्र, चौकशीदरम्यान अशोक खरातची मानसिक स्थिती खचलेली दिसत असून, त्याच्या या वक्तव्यामुळे प्रकरणाला नवं वळण मिळाल्याचं मानलं जात आहे.
