नाशिक: मराठा आरक्षणासाठी लढणाऱ्या मनोज जरांगे पाटील हे नाशिक दौऱ्यावर असताना त्यांनी त्रंबकेश्वरचे दर्शन घेतले. त्रंबकेश्वरमध्ये गेल्यानंतर पुरोहित संघाच्या माध्यमातून त्यांना जणू खजिनाच हाती लागला. हा खजिना आहे तो नामावली रूपाने पुरोहित संघाने जतन करून ठेवलेल्या नोंदीचा. या नोंदीची दखल आता प्रशासनाने घेतली असून नोंदी मागून घेतल्या आहेत.
दरवर्षी देशभरातून लाखो भाविक त्रंबकेश्वरच्या दर्शनासाठी येतात, येथे आल्यावर पुरोहितांकडून पूजापाठ करतात. या दरम्यान पुरोहित आलेल्या भाविकांच्या नोंदी करून ठेवतात. अशा नामावलीत विविध जाती आणि धर्माच्या हजारो नोंदी आजही तिथे उपलब्ध आहेत. त्यामध्ये काही मराठा, कुणबी नोंदी देखील आहेत. याची पडताळणी प्रशासनाच्या बाजूने देखील केली जात आहे.
येथे प्रत्येक जातीनुसार जिल्हा, तालुका आणि गावानुसार नोंदी आजही उपलब्ध आहेत. त्रंबकेश्वर देवस्थानच्या वीस ते पंचवीस खोल्यांमध्ये आणि पुरोहितांच्या घरांमध्ये ही नामावली उपलब्ध आहेत. छत्रपती शिवाजी महाराज यांच्या काळातीलही काही नोंदी यामध्ये आहेत.
पुरोहितांनी पिढ्यान् पिढ्या हा दस्तऐवज जिवापाड जतन करून ठेवला आहे. त्यांची पानं आता काहीशी जीर्ण झाले आहेत. यामधून अनेक मराठा कुणबी समाजाच्या नोंदी शोधल्या जात आहे. हा अनमोल दस्तऐवज आज मराठा आरक्षणाच्या (Maratha Reservation) लढाईत महत्वाचा धागा ठरणार आहे. त्र्यंबकेश्वरमध्ये सापडलेल्या या नोंदीनंतर आता राज्यभरातील मंदिरांमधील जुन्या नोंदी तपासण्यात याव्यात, अशी मागणी मनोज जरांगे यांनी केली आहे.
