कोल्हापूर: सोशल मीडियावरील फोटो पाहून गायिकेचा मोबाईल नंबर मिळवला आणि थेट फोन केल्यानंतर दोघांमध्ये मैत्री झाली. पुढे लग्नाचे आश्वासन देत जवळीक वाढवून हॉटेलमध्ये नेले. तिथे मद्यपान केल्यानंतर तरुणीवर जबरदस्तीने अत्याचार केल्याचा आरोप कोल्हापुरातील एका तरुणावर करण्यात आला आहे. या प्रकरणी शाहूपुरी पोलिसांनी अक्षय भरत फाळके (वय 33, रा. उजळाईवाडी, ता. करवीर) याला अटक केली आहे.
पीडित तरुणी एका हॉटेलमध्ये गायिकेचे काम करत होती. तिची 2017 पासून अक्षय फाळके याच्यासोबत तोंडओळख होती. त्यानंतर ती कामानिमित्त मुंबईला गेली. 2025 मध्ये सोशल मीडियावरील तिचे फोटो पाहिल्यानंतर अक्षयने तिचा मोबाईल नंबर मिळवून तिला फोन केला. वारंवार संपर्क झाल्यानंतर दोघांमध्ये मैत्री झाली.
यानंतर अक्षयने तरुणीसोबत लग्न करण्याची इच्छा व्यक्त केली. जेवायला जाण्याच्या बहाण्याने त्याने तिला एका हॉटेलमध्ये नेले. तेथे त्याने मद्यपान केले आणि नशेत तरुणीवर जबरदस्तीने अत्याचार केल्याचा आरोप आहे. त्यानंतर स्वतःच्या कारमधून पीडितेला विविध ठिकाणी नेऊन पाच वेळा अत्याचार केल्याचे तिने पोलिसांत दिलेल्या तक्रारीत म्हटले आहे.
बहीण-भावाकडून शिवीगाळ आणि धमकी
अक्षयच्या आई, बहीण आणि भावानेही पीडित तरुणीला फोन करून शिवीगाळ केली. तसेच घरात घुसून मारण्याची धमकी दिल्याचा आरोप तक्रारीत करण्यात आला आहे.
या प्रकरणी शाहूपुरी पोलिसांनी अक्षय फाळके याला अटक केली असून, न्यायालयाने त्याला सात दिवसांची पोलीस कोठडी सुनावली आहे. पोलीस निरीक्षक संतोष डोके आणि सहायक पोलीस निरीक्षक सीमा शेळके या प्रकरणाचा पुढील तपास करत आहेत.
