जळगाव: ज्या कुटुंबाचं उत्पन्न आठ लाखांहून कमी आहे, अशा मुलींना येत्या जूनपासून मोफत शिक्षण देणार असल्याची घोषणा राज्याचे उच्च शिक्षणमंत्री चंद्रकांत पाटील यांनी शुक्रवारी केली. कवयित्री बहिणाबाई चौधरी उत्तर महाराष्ट्र विद्यापीठातील एका कार्यक्रमात बोलताना पाटील यांनी ही घोषणा केली.
शुक्रवारी ९ जानेवारीला उच्च आणि तंत्र शिक्षणमंत्री चंद्रकांत पाटील यांच्या उपस्थितीत जळगाव येथील कवयित्री बहिणाबाई चौधरी उत्तर महाराष्ट्र विद्यापीठात विविध नवीन इमारतींच्या उद्घाटनाचा कार्यक्रम पार पडला. या कार्यक्रमात मंत्री चंद्रकांत पाटील यांनी मुलींना मेडिकल, इंजिनिअरिंगसह वेगवेगळ्या तब्बल 600 पेक्षा जास्त अभ्यासक्रमांना मोफत शिक्षण देण्याची घोषणा केली.
आठ लाखांपेक्षा कमी वार्षिक उत्पन्न असणाऱ्या इतर मागास वर्ग तसेच, आर्थिकदृष्टया मागास प्रवर्गातील मुलींच्या सर्व अभ्यासक्रमाची 100 टक्के शैक्षणिक शुल्क प्रतिपूर्ती महाराष्ट्र शासनामार्फत करण्यात येणार आहे.आगामी शैक्षणिक वर्षात अधिकाधिक मुलींचे प्रवेश होतील, यासाठी विशेष अभियान राबवावे, अशा सूचना उच्च व तंत्र शिक्षण मंत्री चंद्रकांत पाटील यांनी दिल्या आहेत. तसेच महाराष्ट्र सीईटी परीक्षेचे वेळापत्रक नियोजित केल्याने यावर्षी एकाही प्रवेश परीक्षेच्या वेळेत बदल करावा लागला नाही, त्याच धर्तीवर राज्यातील विद्यापीठांनी परीक्षेचे वेळापत्रक जाहीर करून निकाल वेळेत जाहीर करावेत, असेही चंद्रकांत पाटील यांनी सांगितले.
