नाशिक : मुंबईतील पायधुनी परिसरातील विषबाधेच्या घटनेनंतर आता नाशिक जिल्ह्यातील आणखी एक संशयित विषबाधेचे प्रकरण चर्चेत आले आहे. बागलाण तालुक्यातील आखतवाडे येथे चिकनचे जेवण आणि त्यानंतर दही खाल्ल्यानंतर प्रकृती बिघडलेल्या वृद्ध दाम्पत्यापैकी पत्नीचा उपचारादरम्यान मृत्यू झाला होता. आता त्यानंतर सुमारे दहा दिवसांनी पतीचाही उपचारादरम्यान मृत्यू झाला आहे. मात्र, या दोघांच्या मृत्यूचे नेमके कारण अद्याप स्पष्ट झालेले नाही.
मिळालेल्या माहितीनुसार, २८ जून रोजी रात्री आखतवाडे गावातील शांताराम आणि द्वारकाबाई ह्याळीज यांनी घरी चिकनचे जेवण केले. त्यानंतर त्यांनी दही खाल्ले. काही वेळातच दोघांची प्रकृती अचानक बिघडल्याने त्यांना तातडीने रुग्णालयात दाखल करण्यात आले. उपचारादरम्यान ६८ वर्षीय द्वारकाबाई ह्याळीज यांचा मृत्यू झाला. तर त्यांचे पती शांताराम ह्याळीज यांच्यावर उपचार सुरू होते. मात्र, मालेगाव येथे उपचारादरम्यान त्यांचाही मृत्यू झाला.
या घटनेनंतर अन्न व औषध प्रशासनाचे पथक आखतवाडे येथे पोहोचले होते. अधिकाऱ्यांनी चिकन, दही आणि इतर खाद्यपदार्थांचे नमुने तपासणीसाठी जप्त केले आहेत. तसेच अन्न तयार करण्याची प्रक्रिया, वापरलेले साहित्य आणि इतर बाबींची चौकशी सुरू आहे.
अद्याप प्रयोगशाळेचा अंतिम अहवाल आलेला नसल्याने विषबाधा नेमकी कशामुळे झाली, याबाबत कोणताही अधिकृत निष्कर्ष समोर आलेला नाही. त्यामुळे चिकन, दही किंवा इतर कोणत्या कारणामुळे ही घटना घडली, याचा तपास सुरू आहे.
वैद्यकीय तज्ज्ञांच्या मते, दूषित किंवा शिळे अन्न खाल्ल्यास फूड पॉइझनिंगचा धोका वाढू शकतो. मात्र, या प्रकरणात मृत्यूचे नेमके कारण तपास अहवाल आल्यानंतरच स्पष्ट होणार आहे. त्यामुळे जिल्हा प्रशासन आणि अन्न व औषध प्रशासन या प्रकरणाचा सर्व बाजूंनी तपास करत आहे.
